طالبلر شیرمحمد عباس استانکزینی سیدطیب آغان اورنیگه قطرده امارت اسلامی سیاسی ادارهسی نینگ سرپرستی ایتیب تعینله گنلر. سیدطیب آغا بوندن اوچ کون آلدین قوراللی طالب ایچیده یوز بیرهدیگن خطالر سبب اوز لوازمیدن استعفا بیرگن ایدی.
طالبلر حرکتینینگ سوزلاووچیسی بو حرکتنینگ ینگیدن تعین ایتیلگن رهبری ملااخترمحمدمنصور نامهسیگه اساسلب تویتریده ترقتگن گزارشده، سیدطیب آغا استعفا بیریشی بیلن بیرگه شیرمحمدعباس استانکزی مذکور گروهنینگ سیاسی ادارهسی مسؤولی ایتیب تعین لنگن.
طیب آغا بوندن اوچ کون آلدین اوز استعفاسینی مدیاگه یوبارگن ایدی. او، اوزینینگ استعفانامهسیده تینچلیک مذاکرهلر پاکستان آرقلی اوتکزیلیشی و ملا محمد عمر وفاتی سیر روشده سقلهنیشی طالبلرنینگ قیلگن خطالریدن بولگنلیگینی عنوان قیلگن.
شونینگدیک سید طیب آغا نامهسینینگ آخریده وجدانی آلدیده شرمنده بولیشنی ایستهمس لیگینی ایتگن. او، قطرده اسلامی امارت سیاسی وکالتخانهسینینگ مسؤولی صفتیده رسما استعفا بیرگن.
عین حالده، ایریم گزارشلرده مذکور ادارهنینگ بلند مرتبهلی رسمیلریدن بولگن عزیزالرحمان و مولوی نیکمحمدهم اوز ایشلریدن چیتلنگنلیگی ایتیلهدی. اما، مذکور گزارش هنوز قیسی بیر منبع تامانیدن تصدیقلنمهگن.
طیب آغا 2009- ییلده طالبلر سیاسی ادارهسینینگ رییسی ایتیب تعین لنگن ایدی.
طیب آغا کویته کینگشینینگ اعضالری همده ملا محمد عمر یقینلریدن بولگن. او، 2009- ییلده طالبلر سیاسی دفتری نینگ رییسی ایتیب تیعنلندی.
جناب استانکزینی تانیشتیریش اوچون طالبلر تامانیدن پشتو تیلیده ترقه تیلگن نامهده «رسمی حکم» بولگنی قیدایتیلگن.
نامهده جناب طیب آغانینگ قیلگن ایشلری آلقیشلنگن. شونینگدیک کیلهجکلده طیب آغانینگ تجربه همده مصلحتلریدن ایش آلینیشی ایسله تیلگن.
قطرده طالبلر حرکتی سیاسی ادارهسینینگ سرپرستی ایتیب تعینلنگن شیرمحمد استانکزی هندوستانده حربی ساحهده تحصیل آلگن و سابق شوروی افغانستانگه قوشین تارتمهگندن آلدین مملکتگه قیتیب جهاد صفیگه قوشیلگن.
جناب استانکزی بوندن آلدین طالبلرنینگ قطردهگی سیاسی ادارهسی معاونی صفتیده وظیفه قیلگن. شونینگدیک استانکزی طالبلر توزومیده تشقی ایشلر همده ساغلیقنی سقلش وزیرلیگی اورین باسری اولهراق خذمت قیلگن.
