سلام‌وطندار ترماغیگه صحبت بیرگن نماینده‌لر مجلسی نینگ ایکّینچی کاتبی نذیراحمدزی‌نینگ بیلدیریشیچه، جمهور رییس غنی نماینده‌لر مجلسی نینگ رهبرلیک هیاتی بیلن اوچره‌شگنده تیز آره ده ایچکی ایشلر، مدافعه وزیرلیگی و ملی خوفسیزلیک اداره‌سیگه اوزگریش کیلتیره‌من دیگن.
بو وزیرلیکلرده فساد آلدی آلینیشی و امنیت یخشی له‌نیش نیتده سیاسی علاقه‌لر طفیلی ایشگه آلینگن شخصلر وظیفه‌دن آلینه‌دی دیگن جناب غنی.
احمدزی‌نینگ سوزلریگه قره‌گنده، جمهور رییس غنی تجربه‌لی شخصیتلرنی امنیتی اداره‌لرده وظیفه‌لنتیریشنی تیلگه آلگن. اونینگ تعبیریچه، امنیت بولیمیده‌گی بولیشق تولدیریلیشی اوچون جمهور رییس غنی عسکرلر، جنرالر و باشقه ملازملرنی ایشدن آلیشی ممکن.
افغانستان حکومتینی مالی نقطه نظردن قوللب قوتله‌ی دیگن دولتلر ایشانچینی آلیش مقصدیده حکومت خوفسیزلیک اداره‌لرگه اوزگریش کیلتیریش اوچون مجبور دیدی مجلس نینگ بو نمایندهسی.
جناب احمدزی، افغانستان امنیتی وضعیتی تیکشیریلیشی اوچون یقین آره ده امریکا، ناتو و اروپا دولتلری‌نینگ نمایندهسی مملکت‌گه سفر قیلیشی کوتیله‌دی دیگن. هیات افغانستان وضعیتی‌نی تیکشیریش‌دن علاوه 190 ته تیک اوچر و چمه‌سی 5 میلیارد اقش دالری مملکت امنیتی بولیمی‌گه کومک قیله‌دی.
ساحه نینگ بعضی بیر متخصصلری اوشبو اوزگریشلرگه اونچه‌لیک ایشانمه‌یدیلر. لیکن، قطار حربی متخصصلر ایسه حکومت امنیتی ادارلرگه اساسی اوزگریش کیلتیریش قدرتیگه ایگه دیدیلر.
سیاسی ایشبیلرمان جاوید غفور، جمهور رییس غنی نینگ بو وعده‌لری عملگه آشیریلگن حالده، امنیت یخشیلنه‌دی دیدی. افغانستان امنیتی اداره‌لریگه اصلاحات کیریتیلیشی اوچون امریکا دولتی رسمی کابل‌نی باسیم آستیشی آلیشی لازم دیگن او.
بوندن آلدین هم امنیتی اداره‌لرده تخصصی بولمه‌گن همده قابلیت‌سیز کیشیلر بارلیگی بار – بار تنقید ایتیلگن ایدی. بونده‌ی کیشلرنینگ امنیتی اداره‌لرده بارلیگی افغانستان خوفسیزلیک اداره‌لریده فساد آشیشی‌گه سبب بولگندی.
