سره له دې، چې د پلازمې کابل ښار اوسېدونکي د اختر په شپو او ورځو کې له ناامنیو اندېښنه لري، خو امنیتي مسولین د شدیدو امنیتي تدابیرو خبر ورکوي.
دغه امنیتي مسولین د کابل ښار اوسېدونکو ته د سختو امنیتي تدابیرو د نیولو ډاډ ورکوي.
کابل ښاریان په دې وروستیو کې د ښار په ګڼه ګوڼې ډکو واټونو کې د مقناطیسې ماینونو د چاودنې شاهدان وو.
د کابل امنیه قومندان عبدالرحمن رحیمي نن د (جولای په ۱۶مه) په یوې خبري غونډې کې وویل، چې دوی د ملي دفاع وزارت او ملي امنیت د ځواکونو په همغږۍ او ګډې مرستې سره د امنیت خونديتوب لپاره ځانکړې تابیاوې نیولي دي.
رحیمي وویل، امنیتي ځواکونه هڅه کوي، چې په ټول توان سره د کابل ښاریانو امنیت خوندي کړي.
نوموړي زیاته کړه، چې پولیس د ولسي وګړو د خوندیتوب لپاره په جوماتونو، تفریح ځایونو، لویو لارو او واټونو کې لومړۍ درجه امنیتي تابیاوې نیولي دي.
په ورته وخت کې د ملي امنیت ویاند حسیب صدیقي د خلکو د امنیت خوندیتوب لپاره د چمتووالي خبره کوي؛ وايي، چې د ولسي وکړو د امنیت خوندیتوب د امنیتي ځواکونو لپاره اختر دی.
له بل لوري د کابل ښار اوسېدونکي له امنیتي ځواکونو څخه د اختر په شپو او ورځو کې دامنیت خوندیتوب غوښته کوي او زیاتوي، چې باید ولسي وګړي د امنیت په ساتلو کې له امنیتي ځواکونو سره مرسته وکړي.
خواجه نصار احمد له امنیتي ځواکونو غواړي، چې په اختر کې دې امنیت خوندي کړي.
نجیب فیض زاده د کابل ښار یو بل اوسېدونکی وايي، چې د امنیت په خونديتوب کې دې خلک له امنیتي ځواکونو سره مرسته وکړي.
شکیب رشاد د کال ښار یو بل اوسېدونکی دی، رشاد له امنیتي ځواکونو نه غواړي، چې د امنیت په خوندیتوب کې دې زیات تلاش وکړی، تر څو خلک خوښۍ په غم نه شي.
دا په داسې حال کې ده، چې تېره ورځ د طالبانو مشر ملا محمد عمر هم په خپل اختریز پېغام کې د سولې خبرو اترو په باب د لومړي ځل له پاره شین څراغ ښودلی او ويلي يې دي، چې له دښمن سره سوله کول کوم شرعي ممانعت نه لري.
