افغانستان صناعت و تجارت اتاغی‌نینگ مسوول‌لریگه کوره، افغانستان‌ده امریکه حربلری‌نینگ قرارگاهی همده هوا میدانلرینی صنعتی همده تجاری مرکزلرگه ایلنتیریش «امریکه – افغانستان تجاری علاقه» ییغینی‌ده بحث ایتیله‌دیگن اساسی موضوعلردن بولیشی ممکن.
افغانستان صناعت و تجارت اتاغی‌نینگ عامل هیأت رییسی عتیق الله نینگ بوگون (سه‌شنبه) کابل‌ده اوتکزیلگن خبری ییغین‌ده ایتیشیچه، افغانستان – امریکه اورته‌سیده‌گی تجاری علاقه‌لرنینگ اون بیرینچی ییغینی جاری ییل قوس آیی‌نینگ اون ییتی‌سیدن اون توقیزیگچه واشنگتن‌ده اوتکزیلیشی کوتیله‌دی.
باشقه تاماندن امریکه – افغانستان قوشمه تجارت اتاغی‌نینگ مدیره هیات رییسی سلیمان لطفی نینگ سوزلریگه کوره، بلخ، قندهار و هرات ولایتلریده‌گی امریکه‌نینگ حربی قرارگاه‌لری استه –سیکین شکلده تجاری مرکزگه ایلنه‌دی. جناب لطفی‌گه کوره، مذکور ایش عمل‌گه آشیریلیشی اوچون دُبی ده افغانستان دولتی بیلن امریکه مدافعه وزیرلیگی اورته‌سیده کیلشوو امضالنگن.
شونینگ‌دیک افغانستان – امریکه قوشمه تجارت اتاغی‌نینگ عامل هیأت رییسی دان رایتر مذکور مملکت‌ده امریکه حربیلرینینگ قرارگاه‌لری تجاری مرکزلریگه ایلنیشی توغریسیده ایتیشیچه، امریکه‌نینگ بو مملکت‌ده‌گی سکیز ییریک حربی قرارگاه تجاری مرکز صفتیده ایش آلینیشی ممکن.
افغانستان صناعت و تجارت اتاغی‌نینگ مسؤول‌لری، افغانستان – امریکه تجاری علاقه‌سی ییغینی اوته مهم بولگن‌لیگینی ایتگن‌لر. رسمیلر مملکت ملی تاجرلری همده سرمایه یاتقیزووچیلریدن اوشبو ییغین‌ده اشتراک قیلیب اوزلریگه اقتصادی شریک تاپیشلرینی سوره‌گن.
صناعت و تجارت اتاغی‌نینگ حساباتی‌گه کوره، افغانستان – امریکه اورته‌سیده قوشمه تجاری اتاق ایجاد ایتیلگن‌دن بیری ایکی مملکت اورته‌سیده‌گی تجاری علاقه 90 میلیونگه ییتگن.
شونینگ‌دیک رسمیلر افغانستان‌ده سرمایه یاتقیزیش یولیده‌گی ییریک معما امنیتی موضوع بولگن لیگینی ایتگن‌لر. اولر حکومت‌دن بو باره‌ده جدی اعتبار قره‌تیش‌نی سوره‌گنلر.
عین حالده افغانستان‌ده سرمایه یاتقزیشنی حمایت قیلیش اداره (آیسا) بوندن آلدین مملکت‌ده سرمایه یاتقیزیش 30%کمیگینی ینه جواز آلیش جاری ییل‌نینگ بیرینچی آلتی آییده اوتگن ییل‌گه قره‌گنده کم بولگنیدن خبر بیرگن ایدی.
