افغانستان عدلیه وزیرلیگی سیلاولر تیزیمیگه اصلاحات کیریتیش کمیسیون مجموعی تکلیفلرینی قبول قیلیب اوتگن کون (دوشنبه) سیلاولر قانونی اوزگرتیریلیشی طرحی اوستیده ایش باشلهگن. سیلاولر تیزیمیگه اصلاحات کیرتیش کمیسیونینینگ تکلیفی بوندن نیچه کون آلدین جمهور رییس غنی تقنینی فرمانی اساسیده تصدیقلنگندی.
جمهور رییس غنی نیچه کون آلدین بیر فرمان صادر ایتیش بیلن سیلاولر تیزیمیگه اصلاحات کیریتیش کمیسیون فعالیتلرینی آلقیشلب، کمیسیوننینگ بیرینچی باسقیچدهگی تکلیفلرینی قیسقه مدتده بوتونلی تصدیقلهدی. جمهور رییسنینگ مذکور فرمانیده کیلیشیچه، عدلیه وزیرلیگی و جمهور رییسلیک سرایینینگ ایشلری بوییچه ادارهنی سیلاولر تیزیمیگه اصلاحات کیریش کمیسیوننینگ ییتی مورددن عبارت تکلیفی قانونی صلاحیتگه ایگه بولیشی اوچون تیزلیکده تدبیر آلیشلرینی سورهگن ایدی.
اوتگن هفته وزیرلر کینگشی ییغینیده هم سیلاولر تیزیمیگه اصلاحات کیریتیش کمیسیون طرحی تصدیقلنگندن کیین جمهور رییس تامانیدن توشیح ایتیلدی. اما مملکت عدلیه وزیرلیگینینگ رسمیلریگه کوره، سیلاولر ینگی قانونی عملده تطبیق ایتیلیشی ملی بیرلیک حکومت رهبری قراریده باغلیق دیر و اولر قانونگه موافق سیلاولر کمیسیونلری کاتبلیگی کمیتهسینی ایجاد قیلیشلری کیرهک.
سیلاولر قانونی و ایکی کمیسیوننینگ تشکیل و صلاحیتلریگه اوزگریش کیریتیلیشی اساسیده سیلاولر کمیسیونلری کاتبلرینی تنلش کمیته توزیلیشی اوچون ولسواللیک کینگشلرگه 25% عیاللرگه سهم بیریلیشی سیلاولر تیزیمیگه اوزگریش کیریتیشنینگ مهم بولیملریدن سنهلهدی.
بوندن ایکی کون آلدین (یکشنبه) افغانستان عادلانه و آزاد سیلاولر بنیادی یا فیفا سیلاولر تیزیمیگه اصلاحات کیریتیش کمیسیون ایشلرینی تنقید قیلیب ایتیشیچه، مذکور کمیسیوننینگ مجموعی تکلیفلری ناقص دیر و قیته کوریب چیقیلیشگه احتیاج بار. فیفا اجراییه باشلیغی محمدیوسف رشیدنینگ بیر خبری ییغینده ایتیشیچه، شفاف کمیته تشکیل ایتیلیشی، سیلاولر حوزهلری بولینیشی، کاتبلیکنینگ صلاحیتلری تعریف بولمهگنی، ولایتلر اوچون ملازملرنی ایشگه آلیشده معین معبار بولمهگنی قانونده سیلاولر جرمی تعریف قیلینمهگنی کمیسیون تکلیفلری قیته کوریب چیقیلیشی اوچون جدی موردلردن سنهلهدی.
