د ترهګرۍ په اړه د امریکا د بهرنیو چارو وزارت په کلني راپور کې لیکل شوي چې پاکستان لا هم د ترهګرو خوندي ځاله ده او دغه هېواد اجازه ورکړې چې طالبانو او حقاني شبکه په افغانستان کې بریدونه وکړي.
دغه راپور چې بېګاه خپور شو، د ۲۰۱۹ کال پر مهال د ترهګرو فعالیت، خوځښتونو او له ترهګرۍ سره د امریکا د مبارزې په اړه معلومات وړاندې شوي دي.
راپور لیکي چې پاکستان د ترهګرو ډلو پر وړاندې لازم اقدامات نه دي کړي. طالبان، حقاني شبکه، طیبه ډله د جیشمحمد ډلې هغه ترهګرې ډلې یادې شوي چې د افغانستان او هند پر وړاندې له پاکستانه ګټه اخلي.
د دغه راپور په یوه برخه کې لیکل شوي چې پاکستان ترهګرو ډلو ته اجازه ورکړې چې د سیمې هېوادونه، په تېره افغانستان او هند خپل هدف وګرځوي.
راپور لیکلي چې چې پاکستان د د جیشمحمد ډلې د مشر مسعود اظهر په څېر د یوشمېر پېژندل شویو ترهګرو پر وړاندې لازم اقدامات نه دي کړي.
د دغه راپور د معلوماتو پر بنسټ، د پاکستان ډېری مدرسې د ترهګرو ځای دی او هره ورځ پهکې ترهګري او افراطیت تدریسېږي.
راپور زیاته کړې، په پاکستان کې د ترهګرو ډلو له فعالیت سره سره، دغه هېواد طالبان اړ کړي چې په افغانستان کې تاوتریخوالی کم کړي.
د امریکا د بهرنیو چارو وزارت د کلني راپور په پای کې لیکل شوي چې د منځنۍ اسیا یوشمېر هېوادونه په افغانستان کې د ترهګرۍ پراخېدو په اړه اندېښمن دي او د سوریې او عراق له جګړې نه را ګرځېدلي افغانان د منځنۍ اسیا لپاره بالقوه ګواښ بولي.
