د نیویارک ټایمیز ورځپاڼې اداره وايي، نن یې وخت دی، چې امریکا په افغانستان کې د دایمې ثبات له پاره په پاکستان فشار راوړي.
ورځپاڼه زياتوي، چې امريکايان د پاکستان له "ډبل ګيم" نه سرخوږی شوي او په واشنګټن کې هڅې روانې دي، چې پاکستان منزوي او فشار پرې راوړل شي.
د امریکا دې معتبرې ورځپاڼې د نن (جمعې) ورځې په سرلیکنه کې کاږلي دي، چې امریکې له پاکستان سره تر اوسه پورې د ۳۳ میلیاردو ډالرو مرسته کړې او تل یې له پاکستان سره د ښو اړیکو پر بنسټ کار کړی، خو پاکستان بیا هم له امریکا سره په لار سم شوی نه دی.
دا داسې مهال ده، چې د افغانستان له پاره د امريکې او ملګرو ځواکونو قوماندان جنرال جان نکلسن به د افغانستان د روانې جګړې د وضعيت په اړه ولسمشر بارک اوباما ته خپل راپور وړاندې کړي.
ورځپاڼه زياتوي، د دې امکان شته چې جنرال نکلسن به د ولسمشر اوباما هغه نظر تر سوال لاندې ونيسي، چې له مخې یې د روان کال تر پايه په افغانستان کې د مېشتو امريکايي سرتېرو شمېر له ۵ زرو او ۵۰۰ را کم کړي.
نيويارک ټایمز په خپله مقاله کې وايي، حقيقت دا دی، چې د سرتېرو د شمېر تر څنګ باید په افغانستان کې د ثبات له پاره د سولې خبرې وشي او په دې برخه کې د پاکستان ونډه کلیدي دی او امریکا باید پاکستان تر سختو فشارونو لاندې ونیسي.
دغه امريکايي ورځپاڼه زياتوي، چې له کلونو راهیسې د پاکستان پوځ او استخباراتي سازمان ای، ايس، ای طالبان او د حقاني شبکه تمویلوي او له دوي نه د حربي وسیلې په توګه کار اخلي؛ په افغانستان کې خپلې ګټې پرې خوندي کوي.
سرمقاله وايي، چې پاکستان د امريکايانو د فشار په مقابل کې په قبایلو سیمو کې عملیات وکړل، خو د حقاني شبکه یې خوندي وساتله، دوی زیاتوي، چې د کارپوهانو په باور اوس پاکستان د طالبانو په مشرتابه کې حقاني شبکه ورګډه کړې ده.
