د ولسمشر لومړي مرستیال امرالله صالح ننګرهار ته خپل سفر کې وویل، طالبانو د ای اس ای تر څار لاندې امریکا سره د سولې هوکړه کړې او دغه ډله هېواد کې د پنجاب تر سیوري لاندې د حکومت جوړېده غواړي.
ننګرهار ته د امرالله صالح د ننني سفر موخه د ښېوې پېښې د وژل شویو فاتحه او د هغوی له کورنیو سره غمشریکي ښودل شوې.
که څه هم طالبانو د کابل دشتي برچي پر روغتون او ښېوې د جنازې مراسو بریدونو کې لاس لرل رد کړي خو د ولسمشر لومړی مرستیال د کوز کونړ پېښې کې د وژل شویو، کورنیو سره خبرو پرمهال طالبان د ښېوې پېښې عاملان وبلل او زیاته یې کړه، دغه ډله به په زور قدرت ته ونه رسېږي.
نوموړي وویل، طالبانو له امریکا سره د سولې هوکړه لیک لاسلیک کړی خو افغان وژنې ته یې دوام ورکړی.
د ولسمشر لومړي مرستیال وویل، ښايي هېواد کې وسلهوالې ډلې نور بریدونه هم وکړي خو دا وړ بریدونه به د خلکو په یووالي، ارادې او مورال منفي اغېز ونه کړي.
د هغه په وینا، د داعش ډلې د دوو مشرانو، اسلم فاروقي او ابو عمر له نیونې او د هغوی له منښتو وروسته د داعش او طالبانو د پېژندنې هېڅ ډول پوښتنه نه پیداکېږي.
صالح وویل، دا دواړې وسله والې ډلې له یوه ځایه خړوبېږي.
امرالله صالح زیاته کړه، د ښېوې پېښې وژل شویو او د ټپيانو کورنیو ته به د افغان امنیتي ځواکونو په څېر امتیازات ورکړل شي؛ خو له خلکو یې غوښتنه وکړه چې د دغې پېښې د څېړلو لپاره دې حکومت ته وخت ورکړي.
ولسي جرګه کې د ننګرهار استازي او ښېوې پېښې کې د ولایتي شورا د وژل شوي غړي عبدالله لالاخان ملکزي پلار ملک قیس نوراغا ملکزي او د شهیدو شویو کورنیو غړیو له امرالله صالح وغوښتل چې د کوز کونړ پېښه دې په هر اړخیز ډول وڅېړل شي.
ملک نوراغا څو ورځې وړاندې رسنیو ته ویلي و چې د ښېوې په اړه اسناد او شواهد هم لري.
د ولسمشر لومړي مرستیال دا هم وویل، اوس د وسلهوالو ډلو پر خلاف ۹۵سلنه عملیات افغان وسله وال پوځ کوي او افغان امنیتي ځواکونه د هر ډول عملیاتو او جګړې وړتیا لري.
د امرالله صالح ننګرهار ته له راتلو سره سم لومړی د غازي امان الله خان مقبرې ته لاړ او د هغه په قبر یې د ګلونو ګېډۍ له اېښودلو وروسته یې جلال اباد کې د ښېوې پېښې د قربانیانو له کورنیو، ځوانانو، مدني فعالانو او مېرمنو سره بېلابېلې ناستې وکړې.
