المصافي کرکټ لوبډله له دویمې ماتې سره مخ شوه

د امریکې په ۸ پړاو ازادو ۲۰ اوریزه کرکټ سیالیو کې افغان المصافي میامي کرکټ لوبډله له دویمې ماتې سره مخ شوه.

د سیالیو د رسمي وېبپاڼې د معلوماتو له مخې المصافي لوبډلې بېګا شپه له "یو، ایس، ال، سټارز" لوبډلې سره سیالۍ وکړه، چې د ۲۰ منډو په توپیر له ماتې سره مخ شوه او له مخکې تګ پاتې شوه.

په سیالۍ کې المصافي لوبډلې د نجیب ترکي د ۶۲ او جاوید احمدي د ۳۶ منډو سره، سره په ۲۰ اورونو کې د ۱۵۸ منډو هدف پوره نه شو کړی او ۱۳۷ منډې یې وکړلې.

المصافي لوبډله په روانو سیالیو کې د سر په سر ۲ ماتو وروسته له مخکې تګ پاتې شوه، خو درېیمه سیالۍ به هم سبا سهار ۵ نیمې بجې له میامي شارکز لوبډلې سره وکړي.

د امریکې په فلوریډا ایالت کې د لومړي ځل له پاره د افغانستان د کرکټ ملي لوبډلې د مشهورو لوبغاړو په ګډون کې یو بشپړ کرکټ کلب په دې سیالیو کې برخه اخیستې وه.

د امریکې په پیل شویو "یو، ایس، اوپن" کرکټ ټورنامنټ کې د هرشل ګبز، سعید اجمل، سیمویل بدري او کامران اکمل په څېر د کرکټ نړۍ د مخکښو لوبغاړو په ګډون ۱۶ لوبډلې برخه لري.

د هوسټن سټالینز لوبډلې په وړاندې په لومړۍ لوبه کې المصافي لوبډله د جاوید احمدي، ګلبدین نایب او نجیب الله ځدران په څېر لوبغاړو شتون کې د نورالحق ملکزي ۲۲ او نجیب ترکي ۲۰ منډو په مټ یوازې په ۱۰۷ منډو سوځېدلې وه.

المصافي میامي کرکټ لوبډله د امریکې په سوداګریزو کرکټ سیالیو کې د ۵ لوبډلو په "الف" ګروپ کې لوبیږي، چې ټولټال به ۳ سیالۍ وکړي.

د المصافي لوبډلې په ګټه تراوسه په شویو ۲ سیالیو کې جاوید احمدي په ۳ وېکټو مخکښ بالر او نجیب ترکی په ۸۲ منډو د المصافي لوبډلې له خوا مخکښ بېټسمین دي.

د افغانستان له  پاره په کورني او نړیوال کرکټ کې د بالېنګ بندیز سره مخ د کرکټ ملي لوبډلې لوبغاړی شبیر نوري په دې سیالیو کې د بالېنګ کولو پرمهال لیدل شوی دی.

معلومه نه ده، چې په شبیر نوري د بالېنګ کولو بندیز پای ته رسېدلی دی او که نه. د امریکې ازاد ۲۰ اوریزه کرکټ سیالیو چارواکي د شبیر نوري د بالېنګ بندیز څخه خبر نه دي.