افغانستان مرکزی قسمیده جایلشگن پنجشیر ولایتیده یوز بیرگن آغیر قار نتیجه سیده کمیده 200 انسان حیاتدن کوز یومیش‌گه سبب بولدی. افغانستان کابینه سی فوق العاده بیر ییغین اوتکزیب حادثه قربان‌لریگه قیغوداشلیک بیلدیریش اوچون، مملکت بولیب اوچ کون ملی ماتم اعلان قیلدی.
جمهور رییس‌لیک سرایی نینگ خبرنامه سیده، شنبه، یک‌شنبه و دوشنبه کونلری افغانستان‌ده ملی ماتم اعلان قیلینگن. شونینگ‌دیک مملکت جمهور رییس‌لیک سرایدن نشر قیلینگن خبرنامه ده، اوشبو اوچ کونده افغانستان بیراغی یریم کوتاریلگن حالتده توره‌دی.
شونینگ‌دیک مملکت نینگ دنیا بویلب سیاسی وکالت خانه لریده هم افغانستان بیراغی یریم کوتاریله‌دی. سونگی بیر هفته ایچیده مملکت نینگ ایریم ولایت‌لریده یاققن آغیر قار و یاغینگرچیلیک‌لر عاقبتیده 250 انسان هلاک بولدی. اما، پنجشیرده عالم‌دن اوتگنلر واقعه سی سابقه سیز بولگن.
کابینه اعضالری نینگ ییغنیده، اوشبو طبیعی حادثه‌ده روی بیرگن جانی و مالی تلفات « جوده قیغولی والمناک» بولگنی تیلگه آلینگن. ییغینده، دین عالم‌لری، بویوک‌لر و قوم یاش اولوغ‌لریدن قربان‌لر روحی‌گه ختم و فاتحه مراسم‌لری اوتکزیلیشی سوره لگن.
جمهور رییس‌لیک سرایی نینگ خبرنامه سیده، حوت آیی نینگ 10- یک‌شنبه کونی جمهور رییس‌لیک سرایی نینگ مسجدی و کابل شهری نینگ مسجدلریده فاتحه و ختم مراسم‌لری اوتکزیلیشی یازیلگن. پنجشیرده‌گی واقعه‌ده هلاک بولگن‌لر سانی آشیشی بیلن مملکت اجراییه ریاستی نینگ باشلیغی عبدالله عبدالله بو ولایت‌گه سفر قیلیب واقعه قربان‌لرینی یقین‌دن کوزتدی.
ایتیلیشیچه، هنوز هم جناب عبدالله پنجشیرده استقامت قیلیشه‌دی. شونینگ‌دیک جمهور رییس اشرف غنی اوتگن کون بو ولایت‌گه سفر قیلیب، فاجعه قربان‌لری خانه دان‌لریگه اوز قیغوداشلیگی‌نی اظهار قیلگن.
شونینگ‌دیک ییغینده جمهور رییس غنی، تیگیشلی اداره‌لرگه قار آستیده قالگن‌لرنی قوتقزیش، قربان‌لرنی عایله لریگه تاپشیریش، یره لنگن‌لر درمانله نیش و تن جراحتی آلگن‌لرگه دستلبکی یاردم‌لرنی ییتکزیب بیریشلیشی اوچون وظیفه بیرگن.
عین حالده، ییغینده تیگیشلی اداره‌لرگه، موتر باریشی اوچون قیین بولگن منطقه‌لرده تیک اوچرلر آرقه‌لی یاردم‌لر ییتکزیب بیریلیشی باره سیده علیحده تاکیدله گن. شونینگ‌دیک واقعه ده جبر کورگن‌لر اوچون، ییگولیک آذوق آوقت و نقد پول یاردم ایتیلیشی تاکیدلنگن.
شوکبی اهالی همده ایش بیلرمانلر، هردایم بونده‌ی وضعیت‌لر آلدی آلینیشی اوچون حکومت‌نی تفاوت سیزلیک‌که عیب‌له کیله دیلر. ایتیلیشیچه، افغانستان حکومتی هر دایم قربان‌لر سانی آشگن‌دن سونگ واقعه باره سیده خبر بوله دی.
