فاریاب ولایتینینگ گزیوان تومنیده جمعیت اسلامی و جنبش اسلامی حزبلری اورتهسیده یوز بیرگن آتیشمهده ایکّی تاماندن 7 کیشی هلاک بولگن و تورت نفر تن جراحتی آلگن.
گرزیوان تومنینینگ ولسوالی عبدالرزاق کاکرنینگ سلاموطندارگه ایتیشیچه، آتیشمه یکشنبهدن دوشنبهگه اوترکیچهسی اسلامی جنبش حزبینینگ قوماندانی ملافیضالله و اسلامی جمعیت حزبیگه وفادر غلام نبی شجاع اورتهسیده روی بیرگن. تومن نینگ دره زنگ قیشلاغیده یوز بیرگن اوروش بوگون کیچکی وقتده اوز پایانیگه ییتگن.
تومن حاکمی، اوروشده ملافیضالله نینگ تورت نفری و غلام نبی شجاعنینگ ایسه اوچ عسکری اولدیریلگن دیدی. شونینگدیک تومن حاکمی، ایکّی تامان آغیر و یینگیل قورال اسلحهنی ایشگه سالگن لیگی نتیجهسیده نیچه یشش اویگه زیان ییتگن دیدی.
گرزیوان تومنینینگ حاکمی، اوشبو ایکّی قوماندان اورتهسیده ایکّی ییلدن بیری اوروش جریانی بارلیگینی معلوم قیلگن. عین حالده، مذکور ایکّی قوماندان نینگ ناقانونی قوراللی شخصلری اهالیدن باج آلیشدن علاوه خلقنی آزار اذیت ایتهدیلر دیگن.
فاریاب پولیس قوماندانی عبدالنبی الهام خبرنی تصدیقلب ایتیشیچه، اوتگن ییلده مذکور ایکّی قوماندان اورتهسیده اوروش یوز بیرگن؛ اما، نهایتده بو قوماندانلر کیلهجکلرده بو قبیل اوروشگه پایان بیریش اوچون وعده بیرگنلر.
عین حالده، فاریاب ولایتیده اسلامی جمعیت حزبی نینگ نمایندهسی مولوی اسدالله جمالی و اسلامی جنبش حزبینینگ مسوولی عطامحمد فیضی، بو ایکّی قوماندان اورتهسیده یوز بیرگن اوروش اوشبو حزبلرگه تیگیشلی ایمس شخص خصومتلر اساسیده روی بیرگن دیگنلر. اولر، مذکور اوروش ده بو حزبلر رهبری نینگ قولی بارلیگینی کیسین رد قیلگنلر.
