.JPG)
د فوټبال د مشهور لوبغاړي لیونیل میسي افغان مینه وال مرتضی احمدي خوب اخر هم په حقیقت بدل شو.
د لیونیل میسي د ټویټر رسمي پاڼې د معلوماتو له مخی، مرتضی احمدي نن د قطر پلازمینې دوحه کې له لیونیل میسي سره وکتل.
مرتضی احمدي د لیونیل میسي په بلنه او لګښت قطر هېواد ته تللی دی او مخامخ یې سره ولیدل.
.jpg)
لیونیل میسي او مرتضی احمدي د بارسلونا او الاهلي فوټبال لوبډلو ترمنځ له سیالۍ مخکې په یو هوټل کې ولیدل؛ چېر ته چی دغه لوبډله د سیالۍ له پاره مېشته ده.
مرتضی احمدي د افغانستان د غزني ولایت اوسېدونکی دی.
نوموړي تېر کال د لیونیل میسي سره د بې سارې مینې لرلو له کبله له پلاسټیک څخه د لیونیل میسي کمېس جوړ او په تن کړی و.
د مرتضی انځورونه په ټولنیزو شبکو کې په پراخه کچه خپاره شول او تر لیونل میسي ورسېدل.
.JPG)
میسي تېر کال مرتضی ته د بارسلونا او د ملي لوبډلې ارجنټاین لاسلیک شوي کمیسونه ډالۍ کړ او دغه راز د لیونیل میسي سره د مخامخ کولو په موخه د هسپانیې سفارت د قطر الوتکې په مرسته هسپانیې ته د مرتضی او د هغه د کورنۍ د لېږلو خبر ورکړ، خو د نامعلوم دلیل له کبله ونه شو.
مرتضی احمدي له مشهورېدو وروسته، تېر کال د مرګ د ګواښونو له کبله له کورنۍ سره د پاکستان بلوچستان ایالت کویټي ښار ته کډه شو.
د هسپانیې بارسلونا فوټبال لوبډله د لیونیل میسي په شتون په خپل تاریخ کې د لومړي ځل له پاره د قطر پلازمینې دوحې ته رسېدلې، چی نن شپه به د افغانستان په وخت د شپې ۸ نیمې بجې د سعودي عربستان د فوټبال اتلې الاهلي لوبډلې سره د فوټبال په دوستانه سیالۍ کې د لوبی ډګر ته ووځي.
د ورکړل شویو معلوماتو له مخی، قطر به له بارسلونا فوټبال کلب سره خپل مالي ملاتړ(سپانسرشپ) له ۴ کلونو وروسته له دغه لوبې وروسته پای ته ورسوي.
