د افغانستان د ممیزو، مېوو او سبزیو د صادراتو پراختیا ادارې مسوولان وايي، سره له دې چې ځېنې صادروونکي بهرني زعفران د افغاني زعفرانو په نوم صادروي؛ خو په تازه وختونو کې ځېنې نور صادروونکي د زعفرانو په رنګ یو ډول مخصوص کاغذ لهدې ګیاه سره ګډوي او وروسته یې نړۍوالو بازارونو ته یې وړاندې کوي.
د افغناستان د ممیزو، مېوو او سبزیو د صادراتو پراختیا ادارې مشر سیدعظیم مصطفی هاشمي وايي، د دوی فني ډلې تثبیت کړې چې د زعفرانو صادروونکي دغه کاغذ له هند هېواده واردوي او بیا یې ورسره یوځای کوي.
سره لهدې چې د دې ادارې مشر د هېواد صادراتي محصولاتو لهپاره د کیفیت سند لرل ارزښتناکه بولي؛ خو وايي، صادروونکي د تقلب په خاطر، زعفران د ازموینې او کیفیت سند ترلاسه کولو لهپاره دې ادارې ته نه ور وړي.
دې سره د کرنې اوبو لګونې او مالدارۍ وزارت ویاند اکبر رستمي وايي، که څه هم دوی تراوسه زعفرانو سره د کاغذ یوځای کولو په تړاو راپور نهدی ترلاسه کړی؛ خو مني چې ځېنې کسان هڅه کوي د افغانستان د زعفرانو حاصل ورکولو پروسېس او د صادراتو بهیر ته زیان ورسوي.
افغانستان د زعفرانو درېیم ستر تولیدونکي هېواد دی چې زعفران یې دا مهال اسیايي، عربي او اروپايي هېوادونو ته صادرېږي.
د کرنې او اوبولګونې وزارت مسوولان وايي، سره له دې چې دغه وزارت د زعفرانو د کښت په پراختیا او د کیفیت په ښه کولو کار کوي؛ د پروسېس او بستهبندۍ پر څرنګوالي یې هم تمرکز لري.
د یادونې وړ ده چې د بېلابېلو هېوادونو د ۳۰۰ ډولو زعفرانو له ډلې په تېرو درېیوو کلونو کې د افغانستان زعفران په بروکسل کې د خوراکي توکیو کیفیت او خوند ټاکلو نړۍوال انسټیټیوټ له لوري د نړۍ غوره زعفرانو وګڼل شول.
