دغه سیالي څه موده وړاندې د بلغاریا هېواد له خوا جوړه شوې وه، چې پکې د نړۍ ۲۹ هېوادونو نېږدې ۱۳ زرو ځوانو زده کوونکو ونډه اخیستې وه.
د سياليو په پایله کې د افغانستان کندهار ولایت ۴ زده کوونکو ته د ښې وړتيا پر بنسټ د سرو زرو مډالونه ورکړل شول.
دغه زده کوونکي هلکان او عمرونه يې له ۱۸ کلونو تيټې ښودل شوي دي.
په کندهارکې د افغان ترک لېسې د ریاضي ښوونکی او دسیالیو مسؤل انجینیر معراج الدین هاند وايي، زده کوونکو ځکه لومړي مقامونه ګټلي، چې د ښوونکو تر څنګ یې مور او پلار هم ورسره مرستې کوي.
د نوموړي په وينا دغه زده کوونکي هر یو الهام، ادریس احمد، ریاض احمد او عبدلرشید نوميږي او ټول يې د اووم ټولګي زده کوونکي دي.
یاده دې وي، چې د رياضي نړیواله سيالۍ په انلاین شکل وه او د نړۍ زرګونو زده کوونکي پکې ګډون کړی و.
د سرو زرو مډال ګټونکي الهام او عبدالرشید وايي، خوشحاله دي، چې هڅې يې ښې پايلې ورکړې.
دوی زياتوي، چې دا مهال هېواد تر هر چا د لوستو ځوانانو پوهنیزو هڅو ته ډېره اړتیا لري او ځوانان باید خپل قيمتي وخت ضایع نه کړي.
د افغان ترک لیسې د علمي سیالیو مسؤل انجینیر معراج الدین هاند بیا وايي، چې علمي اکاډمیک مرکزونه د درس تر څنګ د سياليو جوړولو مسؤلیت هم لري، ځکه د نوموړي په وينا په دا شان سیالیو کې د ماشومانو او زده کوونکو ګډون د دوی د علمي کچې د لوړېدو سبب ګرځېدی شي.
دا په داسې حال کې ده، چې اوس هم د ناامنيو له امله د افغانستان په لېرې پرتو سيمو کې زيات شمېر زده کوونکي له زده کړو بې برخې دي او د مخالفو وسله والو له لوري يې ښوونځي تړل شوي دي.
