د ولسي جرګې د چهارشنبې ورځې په نننۍ عمومي غونډه کې د یو شمېر وکیلانو د وړاندیزونو پر بنسټ د دې جرګې رییس عبدالروف ابراهیمي څو تنو وکیلانو ته دنده وسپارله، چې په افغانخاوره د پاکستان لهخوا د راکټي بریدونو، په افغانستان کې د دغه هېواد د لاسوهنو او ترهګرو راستولو د مخنیوي په اړه د ملګرو ملتونو امنیت شورا ته د شکایت په توګه د ولسي جرګې خبرپاڼه جوړهکړي.
د ملګرو ملتونو امنیت شورا ته د ولسي جرګې دغه خبرپاڼه د جرګې د غړي صالحمحمد سلجوقي لهخوا ولوستل شوه. د دې خبرپاڼې په یو ځای کې ترهګر د افغانستان او نړۍ لهپاره خطرناک چلینج ګڼل شوي او په خبرپاڼه کې ویل شوي دي، چې ډېر ترهګر د پاکستان لهخوا تمویلېږي او په همدې هېواد کې له روزونې وروسته له درنو وسلو سره د ترهګرویزو فعالیتونو لهپاره افغانستان ته رالېږل کېږي.
په خبرپاڼه کې همداراز راغلي دي، چې د افغانستان ولسي جرګه د پاکستان لهخوا د توغندیزو بریدونو او په افغانستان کې په مستقیم او غیرمستقیم ډول لاسوهنه د نړیوالو قوانینو خلاف کړنه ګڼي او په همدې پار د ملګرو ملتونو امنیت شورا ته په رسمي ډول شکایت کوي، چې د پاکستان د دې کړنو مخه ونیسي.
له دې مخکې په ملګرو ملتونو کې د افغانستان دایمي استازي محمود سیقل هم د افغان دولت لهخوا په افغانخاوره د پاکستان د تېري او لاسوهنو په اړه د ملګرو ملتونو امنیت شورا ته رسمې شکایت کړی و او د دې ترڅنګ د یو شمېر امریکایي سناتورانو لهخوا هم د هغه هېواد په کانګریس کې غوښتنه شوې وه، چې پاکستان باید د ترهګرو د ملاتړي هېواد په توګه وپېژندل شي.
