قطرنینگ دوحه شهریده طالبان گروهینینگ نمایندهلری و افغانستان هیأتی آرهسیده ایکی کونلیک صحبت و مذاکره اوتکزیلگنیدن سونگ، ییغین اشتراکچیلری اوتگن کیچه کیچ پیت 8 مادهلیک بیر شرطنامه صادر قیلگنلر.
اوشبو شرطنامهده کیکسه، ناگران و کسل محبوسلر قید و شرط سیز قوییب یوباریلیشی، مملکت بویلب ایش محلی، اوقیش و اورگتیش و تربیهلش مؤسسهلرینی خوفسیزلیگی تأمینلنیشی، اهالی جانی، مالی و منزللری نینگ خوفسیزلیگی سقلهنیشی خصوصیده سوز بیریلیشی و شونینگدیک، تینچ اهالی قربانلیکلری صفرگهقدر کمهییشی توغریسیده سعی و حرکت قیلینیشی اوستیگه تأکیدلنگن.
بیراق، سیاسی و حقوقی ایش بیلرمانلردن بیرقطاری نینگ ایشانچی گه کوره، بو شرطنامه عملگه آشیشی توغریسیده هیچ بیر ضمانت یوق دیر و شو یوزهدن بیرلشگن ملتلر تشکیلاتی، میزبان مملکتلر، ایران و پاکستان شرطنامه عملگه آشیریلیشیدن نظارت قیلیشی کیرهک.
سلاموطندارگه صحبت بیرگن مملکت حقوقدانلری نینگ بیرلشمهسی باشلیغی گلاحمد مددزی نینگ ایتیشیچه، ییغینلرده کوپلب اونملی موضوعلر ایسلنهدی، بیراق عملگه آشیریلیشی خصوصیده، هیچ بیر تامان سوزینی توتمهیدی. اونگه کوره، اوروش قانونلری هردایم افغانستانده اوروش تامانلری تامانیدن نظرگه آلینمهگن.
شونینگدیک، حقوقدانلردن باشقه بیری سبحانالله مصباح نینگ سلاموطندارگه ایتیشیچه، شرطنامه موضوعی و متنی نظریه ده ذکر ایتیلگن، قانونی نقطهی نظردن هیچ بیر قیینچیلیک یوق دیر، بیراق عملگه آشیریلیشی خصوصیده ضمانت بیریلمهگن.
اونگه کوره، بیرلشگن ملتلر تشکیلاتی و بونگه ارهلشگن مملکتلر بو جریاندن نظارت قیلمهگن صورتده، بو شرطنامه هم عمل گه آشیریلمهیدی.
افغانستانلیکلر ارا سوزلشوو ییغینیده اشتراک قیلیشی گه طالبان گروهی قرشیلیک کورستگن تینچلیک ایشلری بوییچه دولت وزیری سلام رحیمی نینگ اوز فیسبوک صحیفهسیده یازیشیچه، بو ییغیندن قولگه کیریتیلگن کیلیشوولر مملکتده تینچلیک برقرارلیک ایتیلیشی خصوصیده امیدوارلیکلرنی کوپهیتیرهدی.
رحیمی نینگ ایشانچی گه کوره، یشاوچیلر اینیقسه عیاللرنینگ حقوقی سقلهنیشی خصوصیده سوز بیریلیشی بو جریانده بحث گه آلینگن اینگ اساسی موضوع بولگن.
بیراق، کابلده خبری بیر ییغین اوتکزگن جمهورلیک ریاست سوزلاوچیسی صدیق صدیقی نینگ ایتیشیچه، بو شرطنامهده افغانستان توزومی سوی تعبیر بولگن و باشقه سوز ایرکینلیگی و سیلاو کبی باشقه موضوعلر توغریسیده صحبت قیلینمهگن. اونگه کوره، افغانستان توزومی اوزاق اوتمیشلردن بویان اسلامی بولگن و اسلامی بولهدی.
اوشبو شرطنامهنی باشقه بیر قسمیده تینچلیک اوچون یول خریطهسی، افغانستانده اسلامی توزوم گه عاید کیلیشوو، تینچلیک جریانی باشلهنیشی و افغانستان ایشلری گه منطقه مملکتلری و باشقه مملکتلر ارهلشمهسی توغریسیده کفالت بیریلیشی خصوصیده، خلق ارا بیر ییغین اوتکزیلیشی ضرور دییلگن.
