هانګ کانګ کرکټ ملي لوبډلې په یواځېنۍ شل اوریزه لوبه کې افغانستان ته په ۴ وېکټو ماتې ورکړه او د افغانستان پر خلاف یې د بریاوو لړۍ یې لا اوږده کړه.

د هندوستان په کوربتوب ۲۰۱۶ م کال شل اوریزه کرکټ نړیوال جام سیالیو ته د تیاریو پر موخه نننۍ شل اوریزه لوبه د عربي اماراتو په ابوظبي کرکټ نړیوال لوبغالي کی وشوه.

په سیالۍ کې د سلګونه افغان نندارچیانو په موجودیت او تشویق کې افغان کپتان اصغرستانکزي پچه وګټله او په خپله یې د لومړۍ لوبې کولو پرېکړه وکړه، چې ښه ثابته شوه.

افغانستان د اصغرستانکزي د لومړۍ نړیوالې شل اوریزه لوبې نیمه سلیزې ۵۱ منډو په مټ سیالې لوبډلې ته په پوره ۲۰ اورونو کې د ۱۶۳ منډو هدف ورکړ.

د افغانستان له پاره سمیع الله شینواري ۳۴ ، شفیق الله شفق ۳۰ او کریم صادق هم د ۲۲ منډو ښه لوبه وکړه.

د هدف د دفاع په موخه هانګ کانګ بی له کومې اندېښنې لوبه وکړه او ټاکل شوې هدف یې د لوبې په وروستي اور څلورم بال د ۶ لوبغاړو په سوځېدلو تر لاسه کړ.

کریم صادق او او روښان بارکزې د افغانستان له پاره مخکښه بالران وو، چې دوه دوه سیال لوبغاړي یی وسوځول، خو د هانګ کانګ لوبډله یې له هدف څخه ایساره نه کړی شوه.

د یادونې وړ ده، چې په نننۍ سیالۍ کې د افغانستان په ټوپ اچونه کې د دولت ځدران او شاپورځدران کمی محسوس شو، چې دواړه د عربي اماراتو د ویزو د نه شتوالي له کبله له ملي لوبډلې سره ملګري نه دي.

دا په روان ۲۰۱۵ م کال کې دویم ځل دی، چې د اسیا وچې دغه کمزورې کرکټ لوبډله، چې له یوه او بل هېواد څخه یی لوبغاړي په کرایه نیولي؛ افغان کرکټ ملي لوبډلې ته ماتې ورکوي.

ټاکل شوې ده د عربي اماراتو په روان سفر کی به افغانستان سبا د عمان کرکټ ملي لوبډلې پر خلاف هم د ۲ نړیوالو شل اوریزو لوبو لړۍ هم پیل کړي.

عمان روان کال هم د ایرلینډ او سکاټلینډ په کوربتوب شل اوریزه نړیوال جام ټاکنیز پړاو کې افغانستان ته ماتې ورکړې وه.