د اسیا په ۲۰ کلنو فوټسال جام سیالیو کې د افغانستان فوټسال ملي لوبډلې سیالان معلوم شول او افغانستان به په «الف» ډله کې سیالي وکړي.
د اسیا فوټبال شورا په خپلې رسمي ټویټرپاڼې کې د سږ کال اسیا ۲۰ کلنو فوټسال جام سیالیو ته د لوبډلو پچه اچونه نن په خپل مرکزي دفتر کې چې د مالیزیا په پلازمېنه کولالمپور ښار کې دی، وکړه.
د پچې اچونې له مخې به افغانستان په لومړۍ ډله کې له ایران او هانګکانګ ۲۰ کلنو فوټسال ملي لوبډلو سره ګروپي سیالۍ وکړي.
د اسیا ۲۰ کلنو فوټسال جام سیالیو کې به ټولټال د فوټسال تر ټولو غوره ۱۲ لوبډلې په ۴ بېلابېلو ګروپونو کې سیالي وکړي چې په «ب» ګروپ کې به ټایلنډ، لبنان او قرغزستان، په «سي» کې به جاپان، وېتنام او تاجکستان او په وروستي (ډي) ګروپ کې به د عراق، اندونیزیا او چاینیزټايپي هېواد ۲۰ کلنې فوټسال ملي لوبډلې سیالي وکړي.
د فوټبال اسیایي شورا د اعلان له مخې به د سږ کال ۲۰ کلنو فوټسال جام سیالۍ د روان کال د جون میاشتې په ۱۴مه نېټه د ایران په کوربهتوب په تبریز ښار کې پیل او په ۲۳مه نېټه به د اتلې لوبډلې په اعلان سره پای ته ورسېږي.
ټاکل شوې د سږ کال په ۲۰ کلنو فوټسال جام سیالیو کې د تېر ځل اتله ایرانۍ لوبډله په خپل کوربهتوب له خپلې تېرې اتلولۍ نه دفاع وکړي.
د یادونې ده چې د افغانستان ۲۰ کلنې فوټبال ملي لوبډلې د «پلېاف» سیالۍ په ګټلو سره د سږ کال ۲۰ کلنو اسیایي فوټسال جام سیالیو ته د دویم ځل لهپاره لار پیدا کړې ده.
افغانستان په ۲۰۱۷ کال کې د اسیا په ۲۰ کلنو لومړي پړاو فوټسال جام سیالیو کې ګډون کړی و چې په ټایلنډ کې وشوې او په خپل «الف» ګروپ کې یې برونایي، مالیزیا او بحرین ته ماتې ورکړې، خو د عراق او ټایلنډ په وړاندې یې ماتې وخوړه.
اړوند مطالب:
افغانستان د نړیوالو سیالیو لپاره د ساحلي فوټسال ملي لوبډله اعلان کړه
کابل کې د ژمني فوټسال ټورنمېنټ پیلېږي
افغانستان د لومړي ځل لهپاره د اسیا فوټسال جام ته لاره پیدا کړه
افغانستان په لومړي پړاو ۲۰ کلنو فوټسال جام سیالیو کې په ۳ بریاوو او ۲ ماتو سره د ۹ امتیازونو پر مټ له عراق او وېتنام وروسته درېیم مقام ګټلی و.
د تېر کال په لومړي پړاو ۲۰ کلنو فوټسال جام سیالیو کې ایران عراق ته په ماتې ورکولو سره د اتلولۍ جام ګټلی و چی له دواړو لوبډلو وروسته وېتنام درېیم او ازبکستان بیا څلورم مقام ګټلی و.
د افغانستان لهخوا په لومړي پړاو ۲۰ کلنو اسیایي فوټسال جام سیالیو کې جاوید حیدري په ۱۰ ګولونو سره دویم مخکښ ګولوهونکی و.
