افغانستان په ساحلي فوټبال کې د جاپان خلاف ستره ماتې وخوړه

د افغانستان ساحلي فوټبال ملي لوبډلې نن (یکشنبې) د اسیا په ساحلي سیالیو کې خپله لومړۍ لوبه وکړه، چې ستره ماته یې په کې وخوړه.

د اسیا ساحلي سیالیو د رسمی وېبباڼې د معلوماتو له مخې، افغانستان نن په خپل لومړي (ډي) ګروپ لوبه کې له جاپان ساحلي فوټبال ملي لوبډلې سره سیالۍ ته برابر شو، چې ۱۱ د ۰ ګول په وهلو له ماتې سره مخ شو.
د دواړو لوبډلو ترمنځ سیالۍ په ۳ پړاونو کې وشوه، چې په لومړۍ نیمایي کې جاپان ۴ د ۰ ګول پر وړاندې، دویمه نیمایي کې ۲ د ۰ ګول پر وړاندې په او وروستۍ درېیمه نیمایي کې یې ۵ د ۰ ګول پر وړاندې ماتې ورکړه.

په سیالۍ کې د افغانستان له خوا ۲ لوبغاړیو محمود ازاد او علي جبیرل علي د غلطیو له کبله زېړ کارتونه هم ترلاسه کړل.

له دې مخکې د افغانستان فوټبال فدراسیون ویلي وو، چې افغان ساحلي فوټبال ملي لوبډلې د نننۍ سیالۍ له پاره څو ورځې پرله پسې په دننګ ښار کې پوره تمرینات کړي او ښه چمتووالي لري.

د ورکړل شویو معلوماتو له مخې، افغان ساحلي فوټبال ملي لوبډله به د اسیا په ۵م پړاو ساحلي سیالیو کې له چین ساحلي فوټبال ملي لوبډلې سره هم لوبه کړي.

د ویتنام په کوربتوب ۵ م پړاو ساحلي فوټبال سیالۍ پرون د روانې سپټمبر میاشتې پر ۲۴ مه نېټه د ویتنام په (دننګ) ښار کې پیل شوي.

په دې سیالیو کې د افغانستان په ګډون د اسیا وچې د ۴۶ هېوادونو څخه سلګونه لوبغاړي په بېلابېلو ورزشي رشتو کې د مډال له پاره لوبېږي.

د دې سیالیو په دوام به افغان ساحلي فوټبال ملي لوبډله سبا د سپټمبر پر ۲۶ مه نېټه له چین ساحلي فوټبال ملي لوبډلې سره هم لوبه وکړي، چې په بریا سره به یې مخکې تګ ته لاره هواره کړي.