افغانستان بوییچه عیاللر و بالهلرنینگ حقوقینی تیکشیریش قوریلمه، مملکت نینگ 6 ولایتیده «قیینچیلیکلر، فرصتلر و اورگهتیش و تربیهلشگه قیزلر قول تاپیشینی تیکشیریش» نامیده اوتکزگن ینگی تدقیقاتینی بوگون «سهشنبه، 3- جدی» کابلده اوتکزگن خبری ییغینده نشر قیلدی.
اوشبو گزارشده ایتیلیشیچه، افغانستان اورگهتیش نظامی سونگی ییللرده کوپینچه یوتوقلرگه قول تاپگن، بیراق حاضرده هم قیز اوقووچیلر برابریده جدی قیینچیلیکلر موجود دیر.
گزارشگه کوره، قیزلردن 63% 13 دن باشلب 15 یاشرلیککهقدر مکتبنی ترک قیلهدی و 26% 15 یاشرلیکدن سونگ تحصیلنی ترک قیلیشهدی.
اوشبو تدقیقاتده 1650 اوقووچی، اوقووچیلر عایلهلری، معارف مدیرلری، مکتبلر مدیرلری، اوقیتووچیلر، تومنلرنینگ کینگیتیریش کینگشی باشلیغلری، حج و اوقاف و عیاللر وزیرلیگی مسووللری، ملی و خلق ارا نهادلر و انسان حقلری کمیسیونی نینگ مسووللری بیلن صحبت اوتکزیلگن.
تدقیقاتده ایتیلیشیچه، قیزلردن 48% گه مکتبنی ترک قیلیشلری اوچون ناتینچلیکلر، 21% گه ناتوغری رسمرواجلر و 31% گه ایسه عایلهلرنینگ آواره بولگنی و کمبغللیک سبب بولگن.
مکتبلرده عیال اوقیتووچیلر کملیگی، عایلهوی زوروانلیکلر، مکتبلرنینگ اوزاقده بولگنی، اورگهتیش کیفیتی کملیگی و خیابانی اذیتلر قیزلرنینگ مکتبنی ترک قیلیشلریگه سبب بولگن باشقه عامللردن دیر.
اوشبو تدقیقاتده کوپهیتیریلیشیچه، عایلهلردن 64% قیزلرنینگ مکتب باریشلریگه توسیق بولگن و باشقه 36% قیز اوقووچیلر اوز ایستکلری اساسیده مکتبنی ترک قیلیشگن.
مذکور تدقیقاتده حکومت، نمایندهلر کینگشی و ملی و خلق ارا نهادلردن اوزاقده بولگن منطقهلرده عیال اوقیتووچی استخدام قیلیش و ناتوغری اجتماعی و فرهنگی رواجلرنی نابود قیلیش اوچون بودجه اجرهتیلیشی اوچون سعی و حرکت قیلیشلری سورهلگن.
معارف وزیرلیگی سرپرستی میرویس بلخی نینگ اوشبو تدقیقات نتیجهسینی تصدیقلب ایتیشیچه، کمیده 4 میلیون باله مکتب باریشدن محروم قالگن و اولردن 65 یا-ده 70% نی قیزلر تشکیل بیرهدی. جناب بلخیگه کوره، ناتینچلیک، کمبغللیک و ناتوغری رسمرواجلر قیزلرنینگ مکتبنی ترک قیلیشلریگه سبب بولگن. اونینگ کوپهیتیریشیچه، اوشبو قیینچیلیکلرنی حل قیلیش اوچون بیرقطار برنامهلر قولگه آلینگن و کیلهجکلرده عملگه آشیریلهدی.
جناب بلخی نینگ مملکتده 6 مینگ مکتب قوریلیشیگه اشاره قیلیب ایتیشیچه، حاضرگهقدر 2700 مکتب قوریلگن و اولر جملهسیدن 1100 تهسی قیزلرگه عاید و جاری ییلده 7500 عیال اوقووچی مکتبلرده استخدام ایتیلگن.
