.jpg)
اوتگن آی 18- ثور، سرپلده ایکی تیک اوچر طالبلرنینگ نظارتیدهگی منطقهده قونگن. شونینگدیک، بیش کون آلدین، بغلانده طالبلرنینگ نظارتیدهگی منطقهده بیر ناتانیش تیک اوچر 20 دقیقه قونگن. محلی رسمیلرگه کوره، مذکور تیک اوچر طالبلرگه حربی جهاز ییتکیزگن.
محلی رسمیلر، تیک اوچرلر قونگنینی تصدیقلهیدی، بیراق ایچیده بار نرسه و قونگنلریدن مقصد نیمهلیگی توغریسیده دقیق معلومات قولگه کیریتیلمهگن.
عین حالده، حربی ایش بیلرمانلر، قطار حکومتی تشکیلاتنینگ عصیانچلر بیلن علاقهده بولگنی و فضا حاکمیت سیزلیگینی شمالده شبههلی تیک اوچرلر قونگنینی اصلی دلیللردن دیب بیلهدیلر.
حربی ایش بیلرمان جاوید کوهستانی، طالبلر و داعشیلرنینگ حاکمیده ناتانیش تیک اوچرلر قونگنینی شمالنینگ ناتینچ قیلیش پروژهنی بیر قسمی دییدی.
جناب کوهستانینینگ ایتیشیچه، بیرقطارلر طالبلرنی داعش گروهیگه قوشیب و شمالنی چیت ایللیک عصیانچیلر و داعشنینگ اصلی قرارگاهی توزهتیش اوچون سعی و حرکت قیلهدیلر.
کوهستانی، شبههلی کیشیلر گروهی شکلده شمالی ولایتلرگه انتقال بیریلیشینی شمال ناتینچ بولیشی خصوصیدهگی پروژهلرنینگ نشانهلری دییدی.
کوهستانینینگ ایتیشیچه، طالبلر و داعش گروهی نظارتیدهگی منطقهلرده ناتانیش تیک اوچرلر قونگنی توغریسیده افغانستان حکومتینینگ تینچ تورگنی تیزیم ایرکینلیگی و قانونیلیگینی سوراققه دوچ کیلتیریب و امنیتی کوچلرنینگ آرهسیده ایشانچ سیزلیک توغدیرهدی.
بیراق، حربی ایش بیلرمانلردن باشقه بیری کابلخان تدبیر، فضاده افغانستان حاکمیت سیزلیگینی اصلی قیینچیلیک دیب بیلهدی. اونینگ ایتیشیچه، مملکت فضاسی ناتونینگ نظارتیدن چیقمهگن صورتده، حکومت فضانی نظارت قیله آلمهیدی.
جناب تدبیرنینگ ایتیشیچه، افغانستان فضاسیده حاکم بولگن کوچلردن طالبلرنینگ نظارتیدهگی منطقهلرده ناتانیش تیک اوچرلر قونگنی توغریسیده سورهلیشی کیرهک.
اوشبو حربی ایش بیلرمانگه کوره، شمالنی ناتینچ قیلیش اوچون کوپلب کوچ ایش قیلهدی و شونینگدیک، شمالی ولایتلرنینگ چیگرهلری پاکستانگه آچیق دیر.
بیراق، مدافعه وزیرلیگی سوزلاوچیسی اورین باسری محمد رادمنشنینگ ایتیشیچه، حاضرگچه طالبلرنینگ نظارتیدهگی منطقهلرده ناتانیش تیک اوچرلر قونگنینی تصدیقلهیدیگن حجتگه قول تاپمهگنلر. او، مدافعه وزیرلیگی رادار سیزلیگینی تَن آلهدی.
مدافعه وزیرلیگی سوزلاوچیسینینگ اورین باسری، شمالنی ناتینچ قیلیش پروژهسیگه قطار حکومتی تشکیلاتلرنینگ قولی بار دیگن ادعالرنی رد قیلهدی. رادمنشنینگ ایتیشیچه، هوا کوچلری رادارگه قول تاپیشی خصوصیده سعی و حرکت دوام ایتماقده.
