بیرلشگن ملت‌لر تشکیلات جمعیت صندوقی‌نینگ تیکشیروولری نتیجه‌سیگه کوره، افغانستان عیال‌لریدن 87 فایزی زوره‌وانلیک‌دن بیر قسمی‌نی تجربه قیلگن و اولردن 62 فایزی نیچه قسم زوره‌وانلیک‌که روپه‌ره بولگن.
افغانستان بوییچه خلق ارا ساغلیک تشکیلات نماینده‌سی شریف‌الله حقمل‌نینگ، اوتکن (دوشنبه کون) عیال‌لرگه قرشی جنسی زوره‌وانلیک توغری‌سیده خبرچیلرنی آگاه‌لنتیریش ییغینیده ایتیشیچه، جنسی زوره‌وانلیک میزانی بیر ولایت‌ده باشقه ولایت‌گه قره‌گنده فرق قیله‌دی. جناب حقمل‌گه کوره، اوشبو زوره‌وانلیک‌لر میزانی احتماع بیلن علاقه‌ده بولگن.
خلق ارا تشکیلات نماینده‌سی‌نینگ ایتیشیچه، اوشبو تشکیلات معلومات‌لری اساسیده، عیال‌لردن 35 فایزی ایرکین صورتده، زوره‌وانلیک‌که روپه‌ره بوله‌دی و زوره‌وانلیک‌لرنی کوپینچه میزانی جنسی زوره‌وانلیک‌که باغلیق.
حقمل‌نینگ ایتیشیچه، زوره‌وانلیک‌لردن 70 فایزی قربان بولگن‌لرنینگ یقین‌لری تامانیدن یوزبیره‌دی.
خلق ارا ساغلیک تشکیلات رسمی‌لری‌نینگ ایتیشیچه، کیم سیتیش و اهانت، سوکیش و کلتک‌لش جنسی و روانی زوره‌وانلیک‌لر جمله‌سیدن سنله‌دی.
شونینگ‌دیک بیرلشگن ملت‌لر تشکیلات جمعیت صندوقی رسمی‌لری‌نینگ ایتیشیچه، جنسی زوره‌وانلیک فیزیکی، جنسی و روانی زوره‌وانلیک‌لر ایچیده کوپینچه رقم‌نی تشکیل بیره‌دی.
بیرلشگن ملت‌لر تشکیلات جمعیت صندوقی نماینده‌سی داکتر عبدالبسیط‌نینگ ایتیشیچه، جنسی زوره‌وانلیک‌که قربان بولگنلردن کوپینچه‌سی ایریم دلیل‌لر، جمله‌دن شکایت‌لرنی تینگلش و رویخطگه آلیش اوچون بیللی قوریلمه بولمه‌گنی باعث، کورگن زوره‌وانلیک‌لرینی رویخطگه بیره‌آلمه‌گن یا اوشبو موضوع‌گه علاقه کورستمه‌گن. اونگه کوره، مملکت عیال‌لری اویدن چیقاریلیشی و فرزندلرینی قولدن بیریش‌دن قورقیب اوزلریگه قرشی یوزبیرگن زوره‌وانلیک لر توغری‌سیده گزارش بیریش‌دن وازکیچگن.
معلومات‌لر اساسیده، زوره‌وانلیک قربان‌لری واقعه‌دن کیین، کوپینچه قیین‌چیلیک‌لرگه روپه‌ره بوله‌دی. بیرلشگن ملت‌لر تشکیلات جمعیت صندوقی و مملکت ساغلیک وزیرلیگی، بو توغریده درمانی و روانی خذمت‌لر ارایه ایتیش خصوصیده، کوپینچه مرکز ایجاد ایتگن.
اوشبو مرکزلر میلادی 2013- ییل‌ده بیرینچی‌دن کابل و ننگرهار، کیین هرات، بلخ، بامیان و بغلان ولایت‌لریده آچیلگن و حاضرگچه 1430 کیشی‌نی دارو و درمان قیلگن.
سمنگان‌ده عیال‌لرگه قرشی زوره‌وانلیک کوپیگن
عین حالده، سمنگان ولایتی عیال‌لر ایشلر بوییچه ریاست رسمی‌لری‌نینگ ایتیشیچه، اوتکن ییل‌گه قره‌گنده جاری ییل بیرینچی 8 آیی‌ده زوره‌وانلیک میزانی آشگن.
سمنگان ولایتی عیال‌لر ایشلر بوییچه ریاست باشلیغی خدیجه حسینی‌نینگ، (دوشنبه کون) بیر خبری ییغینده ایتیشیچه، مذکور ولایت‌ده اوتکن ییل 12 آی‌ده عیال‌لرگه قرشی 123 زوره‌وانلیک واقعه رویخطگه آلینگندی؛ حاضر جاری ییل بیرینچی 8 آیی‌ده 185 زوره‌وانلیک قضیه رویخطگه آلینگن.
خانم حسینی‌گه کوره، سمنگان‌ده عیال‌لرگه قرشی زوره‌وانلیک رقمی کوپیماقده. ایتیلیشیچه، مذکور ولایت‌ده سنتی رسم‌و‌رواج‌لردن بیرقطاری رنگ آلگن.
سمنگان دین عالم‌لریدن بیری مولوی حنیفی، عایله‌لر آگاه‌سیزلیگی، جبری تورموش قوریش‌لر و ناتوغری رسم‌ورواج‌لرنی زوره‌وانلیک‌لر عاملی دیب بیله‌دی.
جناب حنیفی، برچه دین عالم‌لریدن مسجدلرده منبر آرقه‌لی، اسلام دینی اساسیده، عیال‌لرنینگ شرعی حقی‌دن خلق‌نی آگاه‌لنتیریشنیی سوره‌دی.
افغانستان، عیال‌لرگه قرشی تبعیض‌نی یوقاتیش کنوانسیونی‌گه قول قویگن 187 مملکت‌دن بیری بولگن و بو قانون ماده‌لرینی عمل‌گه آشیریش خصوصیده مسؤول دیر؛ بیراق خلق ارا سعی و حرکت‌لر و بیریلگن یاردم‌لرگه قره‌گنده، افغانستان حاضرگه قدر بو قیین‌چیلیک‌نی کمه‌یتیره آلمه‌گن.
