افغانستان امنیتی کوچلری، قندوزدهگی توقنهشوولرنی 7- کونیده، مذکور شهرنی کته قسمینی قولگه کیریتدی. اوشبو عملیات اوتکن کیچه ناتو کوچلری هوایی حمایتیده یولگه قوییلیب و حاضرگچه دوام ایتماقده.
امنیتی کوچلر ینگی منطقهلرنی قولگه کیریتکنیدن کیین، طالبلرنینگ آق بیرهقینی توشیریب و افغانستان بیرهقینی بوزیلگن بنالر اوستیگه کوترگن.
امام صاحب بندری، سه درک، چلۀ مزار، بالاحصار، خاک کنی و زاخیل اوتکن 7 کونده طالبلرنینگ اونملی مرکزی ایدی، بو منطقهلر یکشنبه کون دولتی کوچلر نظارتیگه اوتدی.
اوشبو عملیات تلفاتی توغریسیده حاضرگه قدر معلومات قولگه کیریتیلمهگن.
قندوز امنیه قومندانی جنرال قسیم جنگلباغنینگ ایتیشیچه، یاردمچی و ینگی کوچلر قندوزگه ییتیشگن و حاضر شهر نظارتی امنیتی کوچلر اختیاریده بولگن.
قندوز یشاوچیلرینینگ ایتیشیچه، اولر آذیق آوقت، دارو و سوو کملیگی روپهره بولگن. شونینگدیک خلق شهردن قاچیب چیقماقده. قندوز شهرینی کته قسمی قولگه کیریتیلگنیدن کیین، امنیتی کوچلر خلقگه تیارلنگن آذیق آوقت ترقتگن.
قندوز ولایتی کینگشی اورین باسری امرالدین ولی سلاموطندار بیلن اوتکزگن صحبتیده، حاضرگچه شهر ایچیده اوروش دوام ایتهیاتگنینی بیلدیرگن. اونگه کوره، قندوزده ییتیشرلیچه کوچ ییتیشگن، بیراق شهرده عملیات سُستلیک بیلن ایلگری بارماقده.
جناب ولینینگ کوپهیتیریشیچه، طالبان گروهی ایریم بهانهلر بیلن خلقنی قینب و هیچ بیر جنایتدن وازکیچمهیدی.
قندوز شهریگه قوشیمچه، طالبلر مذکور ولایتنی بیرقطار تومنی جملهدن دشت ارچی و چهاردره ده حاکم بولگن.
ایتیش لازم، قندوز قوشیمچه تخار و بدخشان ولایتلریدههم اوروش کینگهیگن و امنیتی کوچلر نیچه تامانلمه اوروشماقده. بیراق خلق تینیمسیز اوروش و قیینچیلیکلر یکونلنیشینی کوتهدی.
سوداگرلردن یاردم توپلنماقده
مملکت صنعت و سوداگرلیک اتاقی رسمیلرینینگ ایتیشیچه، مملکت سوداگرلری، قندوز اوروشی نتیجهسیده بدرغه بولگنلر توغریسیده اوچ یوزمینگ دالر توپلهگن.
صنعت و سوداگرلیک اتاقی اورین باسری خانجان الکوزی، (یکشنبه کون) کابلده اوتکزیلگن خبری ییغینده ایتیشیچه، قندوز بدرغهلری خصوصیده ایجاد ایتیلگن کینگش آرقهلی، مذکور ولایت بدرغهلری اوچون کوپراق یاردم توپلش توغریسیده سعی و حرکت قیلهدی.
اونینگ کوپهیتیریشیچه، نه فقط قندوز بدرغهلری یاردمگه احتیاج، بلکیم اوروش دوامیده قمهلیب قالگن یشاوچیلرنینگهم تیزیاردمگه نیازی بار.
سوداگرلیک اتاقی اورین باسری، ایکی تامان اوروشچینلریدن قندوز خلقیگه یاردم ییتکزیش چاغیده، آتش کیسین قیلیشلرینی سورهدی.
سوداگرلیک اتاقی هیأت مدیری سوداگرلیک اورین باسری یونس مومندنینگ، بو اولتیریشده ایتیشیچه، مملکت ایریم ولایتلرینینگ سوداگرلری، قندوز یشاوچیلریگه یاردم بیریش خصوصیده، تیارگرلیک کورستگن.
عین حالده، قندوز خلقی کینگشی باشلیغی محمددین همدردنینگ اوشبو ییغینده ایتیشیچه، قندوز بدرغهلری و یشاوچیلری یمان حالتگه حیات کیچیرهدی، بیراق دولت اولرگه قرهمهیدی.
جناب همدرد، ملی و خلق ارا یاردم بیرووچی قوریلمهلردن قندوز یشاوچیلریگه یاردم بیریشنی سورهدی.
قوراللی طالبلر ایلگری هفته کینگ شکلده قندوز شهری اوستیگه هجوم اویوشتیریب، مذکور شهرنی قولگه آلگن ایدی، بیراق اوچ کوندن کیین، افغانستان امنیتی کوچلری، ناتو کوچلری هوایی حمایتیده، مذکور شهر ایریم قسمتلرینی قیتهدن قولگه آلدی.
