ملی مصالحه عالی کینگش باشلیغی نینگ ایتیشیچه، افغانستان دولتی نینگ مذاکره قیلووچی هیأتی اوروش و دشمنلیک نی یکونلنتیریش اوچون دوحه کیتگن.
ملی مصالحه عالی کینگش باشلیغی عبدالله عبدالله، بوگون (جمعه ۲۸- سنبله) برهانالدین ربانی ترور ایتیلگنی نینگ ۹- ییللیگی نی ایسلهش مراسمی ده ایتیشیچه، اوروش دوام ایتیش افغانستان اهالیسی تامانیدن قبول قیلینمهیدی.
او، طالبان گروهیدن اورته گه کیلگن فرصت نی قولدن بیرمهسلیکلرینی سورهدی.
شونینگدیک مذکور مراسمده جمهورلیک ریاست بیرینچی اورینباسری امرالله صالح هم قتنشگن ایدی. اونینگ ایتیشیچه، افغانستان بوییچه تینچلیک طلب سیسی کوتاریلگن و شرفلی هیچ بیر افغان تینچلیک بیلن قرشی کیلمهیدی.
او بیاناتی نینگ بیر بولیمیده طالبان گروهی گه خطاب ایتیشیچه: «یوز ییل هم اوروش قیلسنگیزلر، ینه هم شو نقطه گه کیلیب مذاکره میزی گه اولتیرهسیزلر. هر قنچه قان توکسنگیزلر، اوشنچهلیک گناهلرینگیز کوپهیشی ممکن.»
شونینگدیک اسلامی جمعیت حزب باشلیغی صلاحالدین ربانی، جاری سوزلشوولرگه اشاره قیلیب ایتیشیچه، افغانستان اهالیسی نینگ ارزشلری و یوتوقلری مذاکره جریانیده معامله بولمهسی کیرهک.
اونگه کوره، تینچلیک سوزلشوولری نینگ حاضرگی پروسهسی یول خریطهسینی چیزیش و کیلهجک سیاسی تیزیم اوچون یخشی بیر فرصت دیر و بو فرصت قولدن کیتمهسی کیرهک.
افغانستان دولتی و طالبان گروهی آرهسیده تینچلیک سوزلشوولری (شنبه کونی ۲۱- سنبله) دوحه ده باشلندی. مذکور سوزلشوولر باشلنگنیدن بویان ایکی تامان هیأتلری ایکی مرته عمومی ییغین یولگه قویگنلر و قطار موضوعلر خصوصیده کیلیشگنلر.
