پاکستان دولتی تاماندن اوتیش جوازی صادر ایتیلمهگنی باعث، افغانستان سوداگرلیک کانتینرلریدن 300 دن آشهراغی، تورخم چیگرهسیده توختهتیلگن. مملکت صنعت و سوداگرلیک اتاقی رسمیلرینینگ بوگون (یکشنبه) بیر ییغینده ایتیشیچه، پاکستان ایلچیخانهسی تاماندن رخصت نامه صادر ایتیلمهگنی باعث، افغانستان سوداگرلرینینگ تَورلری، بیر هفتهدن بویان تورخم چیگرهسیده توختهتیلگن.
مملکت صنعت و سوداگرلیک اتاقی اورین باسری خانجان الکوزینینگ ایتیشیچه، حکومت بو چیگللیکنی پاکستان بیلن حل ایتمهگن صورتده، اولر بونگه قرشی پاکستانلیک بار تاشیدیگن نقلیه واسطهلرگه افغانستان توپراغیگه کیریش خصوصیده رخصت بیرمهیدی. جناب الکوزیگه کوره، افغانستان بیلن پاکستان اورتهسیده ترانزیتی کیلیشوو (اپتا) گه قول قوییلگنیدن بویان پاکستان بو کیلیشوو خصوصیده بیر قدم هم قویمهگن.
صنعت و سوداگرلیک اتاقی اورین باسرینینگ کوپهیتیریشیچه، پاکستان پولیسی هردایم سوداگرلر و بار تاشیدیگن نقلیه واسطه هیداوچیلریدن پول آلهدی؛ بیراق افغانستان حکومتی بو قضیهگه دقت قیلمهیدی.
شونینگدیک مملکت سوداگرلریدن بیرقطاری، حکومتنی اوشبو قیینچیلیک خصوصیده دقت سیزلیککه عیبلب ایتیشیچه، پاکستان چیگرهلری آرقهسیده سوداگرلیک تَورلرینی توختهتیلیش دلیلی، اوشبو قضیه توغریسیده افغانستان حکومتی تامانیدن دقت قیلینمهگنی دیر. افغانستان سوداگرلریدن بیری حاجی محمد عارفنینگ ایتیشیچه، هر بیر مرته پاکستانگه سوداگرلیک تَورلرینی صادر ایتگن چاغیده، مذکور مملکت امنیتی رسمیلری و پولیسیگه پاره بیرگن.
مملکت صنعت و سوداگرلیک اتاقی رسمیلری، حکومت باشلیغلری اینیقسه مملکت تشقی ایشلر وزیرلیگیدن پاکستان ایلچیسینی تیزلیکده چقیریب، ترانزیتی قیینچیلیکنی حل ایتیشینی سورهدی. ایتیش لازم، افغانستان بیلن پاکستان اورتهسیده قول قوییلگن ترانزیتی (اپتا) کیلیشوویگه اساس، افغانستان بار تاشیدیگن نقلیه واسطهلرگه ایکی مملکت اورتهسیدهگی چیگرهلریدن اوتیش خصوصیده، قید و شرط سیز رخصتنامه بیریلگن.
