افغانستان بوییچه بیرلشگن ملتلر تشکیلاتی رواجلنیش لایحه مرکز دفتری و جاپان ایلچیخانهسی آرهسیده نمایندهلر کینگشی و تومنلر کینگشی سیلاولریدن حمایت قیلیش اوچون 13.1 میلیون دالر شرطنامهسیگه قول قوییلدی.
بوگون کابلده خبری بیر ییغینده افغانستان بوییچه جاپان ایلچیسی میتسوجی سوزوکانینگ ایتیشیچه، تونیق سیلاو یولگه قوییلیشی اوچون یالغیز دولتی ادارهلر جملهدن سیلاولر ایرکین کمیسیونی و سیلاولر شکایتلریگه تینگلش کمیسیونینینگ ایشلریگه باغلیق ایمس، بلکیم سیاسی رهبرلر، حزبلر و اهالینینگ ییترلی همکارلیکلریگه احتیاج دیر. جناب سوزکاگه کوره، جاپان اهالیگه ایجابی جواب بیرهدیگن سیلاولر یولگه قوییلیشیدن حمایت قیلهدی.
افغانستان بوییچه بیرلشگن ملتلر تشکیلاتی باش کاتبی خاص نمایندهسی تادامیچی یاماموتونینگ ایتیشیچه، جاپان یاردمی دنیا جماعهچیلیگی بیرگن سوزینی عملگه آشیریشینی کورستهدی. جناب یاماموتوگه کوره، جاپان یاردمی کیلهجک سیلاو اوچون سیلاولر ادارهلرینینگ ظرفیتی یوقاری کیتیشیگه سبب بولهدی.
شونینگدیک، افغانستان بوییچه بیرلشگن ملتلر تشکیلاتینینگ رواجلنتیریش لایحه مرکز دفتری سرپرستی و ییریک اورین باسری ناپلیون ناوارونینگ ایتیشیچه، هرقندهی ساخته کارلیکدن اوزاق، عدالتلی و تنیق سیلاولر یولگه قوییلیشی اوچون اولر افغانستان حکومتیگه یاردم بیرهدی.
اوشبو ییغینده مالیه وزیرلیگی اورین باسری خالد پایندهنینگ ایتیشیچه، جاپان یاردمی بیرلشگن ملتلر تشکیلاتینینگ رواجلنتیریش دفتری ((UNDP تامانیدن توللنهدی.
بیراق، سیلاولر ایرکین کمیسیونی باشلیغی عبدالبدیع صیادنینگ ایتیشیچه، بونچه پول سیلاولر ایرکین کمیسیونینینگ مصلحتی و همکارلیگیده صرف ایتیلیشی کیرهک. جناب صیادگه کوره، اولر هر قندهی ساخته کارلیکدن اوزاق و تنیق سیلاولر یولگه قوییلیشی اوچون سعی و حرکت قیلهدی و بو کمیسیون هیچ بیر گروه گه تَن بیرمهیدی.
جاپان حاضرگهقدر، خوفسیزلیک، آست قوریلمه، ایکینچیلیک، قیشلاقلرنی رواجلنتیریش، انسان ظرفیتلرینی کوچهیتیریش، اورگهتیش و تربیهلش و ساغلیقنی سقلش بولیملریده افغانستانگه یاردم بیریب کیلگن.
