په پام کې ده، چې د افغانستان د فوټبال ملي لوبډله په غوراوي پړاو سیالیو کې له کوربه هېواد کمبودیا سره د فوټبال لوبه وکړي.
دغه لوبه به په اسیايي جام سیالیو کې د لارې موندنې په موخه وي.
د افغانستان فوټبال فدراسیون له خوا د خپرو شویو معلوماتو پر بنسټ، دغه لوبې به سبا مازدیګر(سه شنبه جون ۱۳ مه) د افغانستان پر وخت ۳ نیمې بجې د پلازمینې پونام پین المپیک فوټبال لوبغالي کې پیل شي.
د دواړو هېوادونو فوټبال ملي لوبډلو روزنکو د یوې خبري ناستې پرمهال وویل، چې دوی د لوبې ترسره کولو لهپاره پوره چمتووالی لري.
افغان روزونکي اوتو فیشټر وویل، ډیر کم وخت کیږي د افغانستان فوټبال ملي لوبډلې روزنه یې پر غاړه اخیستې ده، خو د سینګاپور، ویتنام او مالدیف خلاف لوبو ورته ډیرې هیلې ورکړي.
د هغه پر خبره، د افغانستان فوټبال ملي لوبډلې په بېلابېلو برخو کې پرمختګ راوستل وخت ته اړتیا لري.
افغان کپتان فیصل شایسته هم په خپلو خبرو کې وویل، په تیرو ۲ سیالیو کې یې د کمبودیا په شان ښې او تیارې لوبډلې ته ماتې ورکړې.
دغه راز د کوربه کمبودیا فوټبال ملي لوبډلې برازیلي روزونکي لیوناردو هم په دغه خبري ناسته کې وویل، ویاړي چې د اوتو فیستر په څير د مشهوره پخواني لوبغاړي او روزونکي پر خلاف د کمبودیایې لوبډلې روزنه پر غاړه لري.
لیوناردو، د افغانستان خلاف سیالۍ یې د خپلې لوبډلې لهپاره سخته یاده کړه.
یاده دې وي، چې افغان فوټبال ملي لوبډله د ۲۰۱۹ کال اسیایي فوټبال جام ته د رسیدو په موخه په (اې) ګروپ کې لوبیږي، چې تراوسه یې په ۸ سیالیو کې ۳ ګټلي او ۵ یې بایللي دي.
افغان فوټبال ملي لوبډله په نړیواله درجه بندۍ کې د کمبودیا خلاف د مخکيوالي ترڅنګ پهدغه ګروپ کې هم له کمبودیا وړاندې څلورم مقام له ځان سره لري.
