د افغانستان او "پي، این، جي" کرکټ ملي لوبډلې ترمنځ د لویو وچو "انټرکانټینینټل" جام څلور ورځنۍ لوبه نن په شارجه کرکټ نړیوال لوبغالي کې پیل شوه.

په سیالۍ کې افغان کپتان اصغرستانکزي په عربي اماراتو کې د یوې اونۍ تیرولو او د عمان خلاف د تمریني سیالیو وروسته لومړۍ لوبه کول غوره کړل.

افغان لوبډلې له پیله ترپایه د "پاپو نیو ګیني" بالرانو هیڅ ځواب نه درلوده چې د شهزاد محمدي د ۲۹ ، اصغرستانکزي۲۶  او شرف الدین اشرف د ۲۵ منډو سره سره په ۱۴۴ منډو وسوځیده.

دغه راز دافغانستان لپاره د کورني کرکټ پاچا شبیرنوري په ۳ منډو ، د عمان خلاف سلیزه جوړونکې نورعلي ځدران په ۱۰، میرویس اشرف په ۲ ، سمیع الله شینوارې په صفر ګلبدین نایب په ۱۵ او یامین احمدزې په ۱۲ منډو وسوځید.

که څه هم د عربي اماراتو شارجه لوبغالي د ورو توپ اچوونکو له پاره سازګاره وي، خو د "پي، این، جي" کرکټ ملي لوبډلې لومړي تیز او نیمه تیزبالران د افغانستان خلاف ښه وځلیدل، چې وانوا ۴، نو او سوپر بیا دوه دوه ویکټې ترلاسه کړې.

دیادونې وړ ده، چې نن "پي، این، جي" کرکټ ملي لوبډلې په ځوابي لوبه کی ښکلې بیټینګ وکړ چې نه یواځې ټاکل شوی هدف یې ترلاسه کړ ترڅنګ یې د افغانستان خلاف لومړي ۶ مهم امتیازونه یې هم ترلاسه کړل.

افغان کرکټ ملي لوبډلې له پاره د اعلان شوې ۱۹ کسیزې ډلې څخه ۷ لوبغاړي نبي عیسی خېل، دولت ځدران، نبي عیسی خیل، رحمت شاه زرمتی، نسیم بړیڅ، راشد ارمان او نوازخان د ویزو د نشتوالي له کبله له ملي لوبډلې څخه پاتې شول، چې نن په څلور ورځنۍ سیالۍ کې ګلبدین نایب ، میرویس اشرف او ظاهرخان ته دلوبیدو چانس ورکړل شو.

په روانو څلور ورځنیو سیالیو کې افغانستان د ۸ لوبډلو په کتار کې اوسمهال د عربي اماراتو کرکټ ملي لوبډلې وړاندې اووم مقام له ځان سره لري.

د روانې څلور ورځنۍ سیالۍ دری ورځی لاهم پاتې دي چې پکښې دواړه افغانستان او پی این جي لوبډلې دپایلې بدلیدو چانس لري.

کرکټ نړیوالې شورا "اې، سي، سي" د روانو څلور ورځنیو لویو وچو جام سیالیو جایزه د ټیسټ کرکټ لوبولو چانس اعلان کړیدې.

د ورکړل شویو معلوماتو له مخې چې د سیالیو ګټوونکي لوبډله به د ټیسټ کرکټ لسم مقام لرونکې لوبډلې سره د تګ او راتګ پړاو دوه ټیسټ سیالۍ ترسره کړي چی په ګټلو سره به یې ددوهمې درجې لرونکې هیواد به په ټیسټ کرکټ کې د یوولسم هیواد په توګه وپیژندل شي.