پاکستانلیک میدیالر تامانیدن بیریلگن گزارشلر اساسیده، افغانستان تینچلیگی خصوصیده «لاهور جریانی» ییغینیده بوگون پاکستان نینگ لاهور شهریده یولگه قوییلگن.
اوشبو ییغین «لاهور تینچلیک تدقیقات» مرکزی ده یولگه قوییلگن و بو ییغینده حنیف اتمر، کریم خلیلی، انورالحق احدی، حامد گیلانی، محمد محقق و گلبدین حکمتیار شامل افغانستان سیاستچیلریدن کمیده 30 کیشی اشتراک قیلگن.
مذکور ییغینده پاکستان تشقی ایشلر وزیری شاهمحمود قریشی نینگ ایتیشیچه، مملکتی افغانستانده تینچلیک تأمینلنیشینی ایستهیدی.
اونگه کوره، افغانستان تینچلیگی خصوصیده پاکستان توشونچهسی آچیق دیر و اسلامآباد ایسه افغانستان یشاوچیلری دستلب اوز آرهسیده و کیین ایسه قوشنی مملکتلر بیلن تینچلیک قیلیشی و کیلیشیب آلیشینی ایستهیدی.
اوشبو ییغینده اشتراک قیلگن جمهورلیک ریاستی سیلاوی نینگ نامزدلریدن بیری حنیف اتمر بیر اعلامیهده یازیشیچه: «تینچلیک خصوصیده صداقتلی سعی و حرکتلردن حمایت قیلهمیز و پاکستان افغانلر ارا ایرکین مذاکرهلرگه زمینه یرهتیشی خصوصیده امید بیلدیرهمیز.»
شونینگدیک، اوشبو ییغین اشتراکچیلریدن باشقه بیری اسلامی حزب رهبری گلبدین حکمتیارنینگ ایتیشیچه: «افغانستان قیینچیلیگی اوچون یالغیز آمریکا و طالبان گروهی نمایندهلری نینگ سوزلشوولری ییترلی ایمس دیر، بلکیم افغانستان یشاوچیلری نینگ قیینچیلیکلری اوزلری تامانیدن حل ایتیلهدی.»
بو ییغینده مملکت سابق جمهور رئیسی حامد کرزی هم چقیریلگن ایدی، بیراق اوتگن کون اعلان قیلیشیچه، مصلحت قیلیش و سفر تدبیری اوچون ییترلیچه زمان یوقلیگی باعث، بو ییغینده اشتراک قیله آلمهیدی.
افغانستان تینچلیگی خصوصیده «لاهور جریانی» ییغینی پاکستانده یولگه قوییلگن بیرچاغده، 27- جون جمهور رئیس غنی پاکستان باش وزیری عمران خان نینگ چقیرووی اساسیده، اسلامآبادگه سفر قیلیشی قرار قیلینگن.
روزه هییت بیرهمی مناسبتی بیلن نطق سوزلهگن جمهور رئیس غنی نینگ ایتیشیچه، پاکستان گه قیلگن سفریده مملکت اوچون ینگی تأریخ تیزهدی.
