بوگون «شنبه» هرات و مزارشریف شهرلری مردمی ییغینلرگه گواه بولدی و بو ییغینلرده مملکت ایشلریگه قوشنی مملکتلرنینگ ارهلشوولری و طالبان گروهی دن اولرنینگ حمایتی قارهلنگن.
هرات ولایتیده «تینچلیک لایحهسی، ملی کیلیشوو، روسیه و منطقه مملکتلرینینگ ارهلشوولری» نامی ده یولگه قوییلگن ییغینده هرات مدنی فعاللری و یشاوچیلریدن بیرقطاری، افغانستان ایچکی ایشلری گه مذکور مملکتلرنینگ ارهلشوولریدن تنقید قیلگنلر.
اوشبو ییغیننی یولگه قویگنلر بو ایشلریدن مقصد اهالی نینگ تینچلیک ایستکلرینی افغانستاندهگی اوروش تامانلریگه ییتکزیش دییدیلر.
ییغین اشتراکچیلری نینگ ایتیشیچه، روسیه، ایران و پاکستان مملکتلری بیر تاماندن اوزلرینی تینچلیک و افغانستان اهالیسی نینگ حامیسی دیب بیلهدیلر و باشقه بیر تاماندن حکومت گه قرشی گروهلر اینیقسه طالبان گروهی نی قوللب قوتلهیدیلر.
اولرنینگ ایتیشیچه، مذکور مملکتلر افغانستانده تینچلیک تأمینلنیشی و حکومت بیلن طالبان گروهی آرهسیده مذاکره زمینهسی یرهتیلیشی خصوصیده رول اوینهشلری کیرهک. دولت گه قرشی قوراللی گروهلرنی حمایت قیلیشدن قول تارتیشلری لازم.
عین حالده، بلخ مدنی فعاللری و یشاوچیلریدن بیرقطاری، ایری بیر ییغین یولگه قوییب تشقی مملکتلر اینیقسه قوشنی مملکتلرنینگ ارهلشوولریدن تنقید قیلگن.
اولرنینگ ایتیشیچه، افغانستان نینگ حاضرگی اوروشی اقتصادی اوروش دیر و افغانستانده دایمی تینچلیک تأمینلنگن صورتده، اینگ کته اقتصادی زیان افغانستان ایچکی ایشلریگه ارهلشهدیگن مملکتلرگه ییتیشهدی.
افغانستان ایچکی ایشلریگه قوشنی مملکتلرنینگ ارهلشوولریدن بولگن تنقیدلر ینگی ایمس دیر.
سیاسی ایش بیلرمانلرگه کوره، تینچلیک خصوصیده بولگن سونگی سعی و حرکتلرگه قرهگنده، مذکور مملکتلر ایلگریدن کوره کوپراق افغانستان قرارلریگه کلیدی شکلده رول اوینهش اوچون سعی و حرکت قیلهدیلر.
