افغانستان ایریم منطقه‎لریدن سیلاو گزارشی

نماینده‎لر کینگشی سیلاوی "شنبه" کونی مملکت 32 ولایتی‎ده یولگه قوییلدی، بیراق اوشبو لایحه خصوصیده قطار شکایت‎لر ثبت ایتیلگن و قطار آواز بیریش مرکزلرنینگ یاپیق قالگنی باعث مذکور لایحه کین‎گه تشلندی.

سیلاو تورت نظارت‎چیسی‎نینگ جسدی بلخ ولایتیده تاپیلگن

نماینده‎لر کینگشی سیلاوی‎نینگ نامزدلریدن بیری‎نینگ 4 نظارت‎چیسی اوتگن کونی بلخ ولایتیده طالب‎لر تامانیدن اوغرلنگن ایدی، بیراق بوگون "یکشنبه" جسدلری تاپیلگن.

بلخ پولیس قومندانی محمداکرم سامح‎نینگ اوشبو خبرنی تصدیق‎لب ایتیشیچه، مذکور کیشی‎لر "شنبه" کونی بلخ ولایتی نهرشاهی تومنی‎نینگ افغانیه منطقه‎سیدن اوغرلنگن ایکن.

جناب سامح گه کوره، اوشبو واقعه عامل‎لرینی قولگه آلیش اوچون سعی و حرکت‎لرنینگ دوامی بار.

قندوز

بوگون "یکشنبه" قندوز ولایتی‎نینگ قطار تومن‎لریده 8 آواز بیریش مرکزنینگ فعال بولیشی ممکن ایدی، بیراق اوشبو مرکزلر امنیتی تهدیدلر سبب یاپیق قالگن.

قندوز ولایتیده سیلاولر ایرکین کمیسیونی‎نینگ ولایتی دفتر باشلیغی محمدرسول عمرنینگ سلام‎وطندارگه ایتیشیچه، مذکور مرکزلر 4 تومن‎ده قرار تاپگن.

"شنبه" کونی امنیتی تهدیدلر باعث قندوز ولایتی‎نینگ علی‎آباد، آقتاش، امام‎صاحب و چهاردره تومن‎لریده آواز بیریش مرکزلر فعال بولمه‎گن.

جوزجان

جوزجان مرکزی و تومن‎لری طالب‎لرنینگ قطار هجوم‎لری بیلن دوچ کیلیب بیراق امنیتی کوچ‎لر تامانیدن کینگه اوریلگن.

جوزجان حاکمی مولوی لطف‎الله عزیزی‎نینگ ایتیشیچه، امنیتی کوچ‎لر طالب‎لرنینگ هجوم‎لریگه توسیق بولگن. اونینگ ایتیشیچه، جوزجان اهالیسی اینقسه عیال‎لر کینگ شکلده سیلاوده اشتراک قیلگن.

جوزجان ولایتیده سیلاولر شکایت‎لرینی تینگلش کمیسیونی‎ مسوولی فرزانه کریمی‎نینگ ایتیشیچه، حاضرگه‎قدر کمیده 50 شکایت اوشبو اداره‎ گه ثبت ایتیلگن.

جوزجان ولایتیده 4 عیال شامل 30 کیشی اوز لرینی نامزد قیلگن، بوجمله‎دن بیر عیال شامل 5 کیشی یوقاری آوازنی قولگه کیلتیریب نماینده‎لر کینگشی‎گه یول تاپه‎دی.

ننگرهار

ننگرهار ولایتی محلی رسمی‎لری‎نینگ ایتیشیچه، بوگون "یکشنبه" اوشبو ولایت 14 آواز بیریش مرکزیده آواز بیریش باشله‎نگن.

ننگرهار حاکمی‎نینگ سوزلاوچیسی عطاالله خوگیانی‎نینگ سلام‎وطندارگه ایتیشیچه، "شنبه" کونی فعال بولگن مرکزلرنینگ آوازلری حساب لنگن، بیراق اشتراک قیلگن‎لرنینگ ارقامی خصوصیده معلومات بیرمه‎یدی.

سیلاو بیرنچی کونی‎ده قورالی طالب‎لر اوشبو ولایتده 15 هجوم یولگه قویب نتیجه‎ده 3 کیشی هلاک ایتیلیب و باشقه 44 کیشی یره‎لنگن.

لوگر

لوگر ولایتی‎نینگ امنیتی مسوول‎لریگه کوره، امنیتی کوچ‎لر و طالب‎لر آره‎سیده یوز بیرگن آتیشمه نتیجه‎سیده 11 طالب هلاک ایتیلیب و باشقه 19 طالب یره‎لنگن.

لوگر پولیس قومندانلیگی‎نینگ سوزلاوچیسی شاهپور احمدزی‎نینگ ایتیشیچه، مذکور واقعه‎گه امنیتی کوچ‎لردن 7 ته‎سی یره‎لنگن.

بیراق امنیتی منبع‎لردن بیری‎نینگ کیم‎لیگی سیر قالیش‎نی ایسته‎ب سلام‎وطندارگه ایتیشیچه، آتیشمه نتیجه‎سیده پولیس کوچلریدن 5 ته‎سی هلاک ایتیلگن. منبع گه کوره، لوگر ولایتی‎نینگ چرخ و خروار تومن‎لریده سیلاو یولگه قویلمه‎گن.