بوگون «دوشنبه» کابل‌ده افغانستان ساغلیق‌نی سقلش وزیرلیگی تامانیدن قاره سریقلیک یا-ده هپاتیت خلق ارا کونی نشانلندی.
معالجه‌وی طب عمومی باشلیغی بشیراحمد حمیدنینگ ایتیشیچه، بوتون دنیاده 300 میلیون دن آرتیق کیشی قاره سریقلیک‌که چالینگن، بیراق افغانستانده اوشبو کسل‌لیک‌که چالینگن هر 10 کیشی‌دن 9 ته‌سی کسل‌لیگی توغریسیده هیچ نرسه بیلمه‌یدی.
جناب حمیدی گه کوره، ساغلیق‌نی سقلش وزیرلیگی تامانیدن اهالی‌نی ساغلیک وضعیتی‌دن آگاه‌لنتیریش نیت‌ده «هپاتیت اوچون قانلرینگ‌نی معاینه قیلینگ» شعار ریجه‌لنگن.
عین حالده، خلق ارا ساغلیک تشکیلاتی‌نینگ معلوماتی گه کوره، افغانستانده B تورلی سریقلیک 1.9% و C تورلی سریقلیک 1.1% بولگن. مذکور تشکیلات‌نینگ مسؤوللریگه کوره، سریقلیک بونچه بولیشی خواطرلی دیر. کابل و هرات ولایت‌لریده هپاتیت کسل‌لیگی موجودلیگی‌دن کوپینچه اورنک رویخط‌گه آلینگن.
ساغلیق‌نی سقلش وزیری فیروزالدین فیروزنینگ ایتیشیچه، حاضرگه‌قدر مملکتده 12 میلیون کیشی سریقلیک کسل‌لیگی‌نی بیللی قیلیش اوچون معاینه بولگن و بو آره‌ده اولردن 40 مینگ ته‌سی B هپاتیت گه و باشقه 18 مینگ ته‌سی C هپاتیت گه چالینگن.
ساغلیق‌نی سقلش وزیری گه کوره، سونگی نیچه دهه اوروشلری، چیگره آچیقلیگی، ایچکی و تشقی مهاجرت‌لر، زرقی ماده‌لردن فایده‌لنیش، ایش سیزلیک، یشاوچیلرنینگ سوادی کم‌لیگی و ساغلیک و اجتماعی خذمت‌لرگه قول تاپه آلمس‌لیک سبب، افغانستانده هپاتیت کسل‌لیگی کونساین رواجلنه‌دی.
طبی معلومات‌لر اساسیده، ایدز و سریقلیک ویروس‌لری قان، جنسی قرابت و بو ویروس‌لرگه باتگن پیچکاری‌لر آرقه‌لی بیر کیشی‌دن باشقه بیر کیشی گه اوته‌دی.
