افغانستانده هر بیر آیده اورتهچه 142 کیشی ماین پارتلهشی نتیجهسیده اولیب و ناگران بولهدی.
طبیعی حادثهلرگه کورهش ایشلری بوییچه دولت وزیرلیگی مسؤوللری و بیرلشگن ملتلر تشکیلاتینینگ ماین تازهلش دفتری، بوگون «مایندن آگاهلنتیریش و ماین تازهلش برنامهگه یاردم بیریش» خلق ارا کونیدن نشانلش ییغینیده، افغانستانده یول چیککهسیده ییرلشتیریلگن ماینلر و پارتلاوچی مادهلر قربانلیگی و قربانلرینی خواطرلی دیب ایتیشیچه، آتیشمهلر دوام ایتگنی سبب، مملکتنینگ کوپینچه قسمتلری مایندن تازهلنمهگن.
اولرنینگ ایتیشیچه، مملکتده اوروش دوامی و ناتینچلیکلر کینگهیگنی باعث، حاضرگهقدر، کوپینچه کیشیلر، یول چیککهسیده ییرلشتیریلگن ماینلر و پارتلاوچی مادهلر پارتلهشی نتیجهسیده قربان بولهدیلر.
طبیعی حادثهلرگه قرشی کورهش ایشلری بوییچه دولت وزیری ویس احمد برمکنینگ ایتیشیچه، افغانستانده ماین پارتلهشیدن کیلیب چیقهدیگن قربانلیک میزانی، میلادی 2011- ییلدن بویان آشماقده. جناب برمکنینگ ایتیشیچه، میلادی 2016- ییلده رویخطگه آلینگن رقملرگه کوره، هر بیر آیده اورتهچه 142 کیشی ماین پارتلهشی نتیجهسیده قربان بولهدی. اونگه کوره، بو رقم میلادی 2011- و 2013- ییللر هر بیر آیده 36 کیشیگه ییتیشردی.
طبیعی حادثهلرگه قرشی کورهش ایشلری بوییچه دولت وزیرینینگ کوپهیتیریشیچه، مملکتنینگ 17 ولایتیده اولرنینگ دستلبکی تیکشیروولریگه کوره، مذکور ولایتلرده چمهسی 400 کیلومتر مربع ییر ماین و پارتلاوچی مادهلردن تازهلنمهگن و اولر تازهلنیشی کیرهک.
طبیعی حادثهلرگه قرشی کورهش ایشلری بوییچه دولت وزیرلیگینینگ منسجم و ماین تازهلش ادارهسی باشلیغی محمد شفیق یوسفی، مملکتده ماین تازهلش برنامهلریگه قرشی اساسی قیینچیلیک بودجه کملیگی و ناتینچلیکلر دیب بیلهدی.
شونینگدیک، اوشبو ییغینده بیرلشگن ملتلر تشکیلاتی خاص نمایندهسینینگ اورین باسری توبی لنزر، مملکتده ماین تازهلش خذمتلری ملی و خلق ارا ایشلاوچیلرینینگ 27 ییللیک سعی و حرکتلریدن تقدیرلب و اهالیگه ایشانچ بیریشیچه، بیرلشگن ملتلر تشکیلاتی برچه امکانیت بیلن بو توغریده افغانستان حکومتیگه یاردم بیرهدی.
