افغانستان تشقی ایشلر وزیرلیگی مطبوعات دفتری نینگ ایتیشیچه، بوگون «دوشنبه، 26- جوزا» افغانستان، امریکا و روسیه آره‌سیده تینچلیک جریانی توغریسیده اوچ تامانلمه ییغین یولگه قوییلیشی خصوصیده قرار قیلینگن.
بوگون «دوشنبه، 26- جوزا» کیچ قورون ساعت آلتی اطرافیده ویدیو کنفرانس آرقه‌لی اوتکزیله‌دیگن ییغینده افغانستان تشقی ایشلر وزیرلیگی‌نی سرپرستی محمدحنیف اتمر، افغانستان تینچلیک لایحه‌سی بوییچه امریکانی خاص نماینده‌سی زلمی خلیلزاد و افغانستان بوییچه روسیه نی نماینده‌سی ضمیر کابلوف اشتراک قیلیشی ممکن.
مملکت تشقی ایشلر وزیرلیگی نینگ مطبوعات دفتری تامانیدن بیریلگن معلومات اساسیده، بو ییغینده زوروانلیک‌لر کمه‌ییشی، افغانلر ارا مذاکره باشله‌نیشی، محبوس‌لر المشتیریلیشی، دایمی آتیش‌کیسین و افغانستان تینچلیک جریانی توغریسیده خلق ارا و منطقه‌یی کیلیشوو تأمین‌لنیشی بحث گه آلینه‌دی.
اوشبو اوچ تامانلمه ییغین یولگه قوییلیشی کوتیلگن بیرچاغده، اوتگن کون «یکشنبه، 25- جوزا» جمهورلیک ریاست سوزلاوچیسی صدیق صدیقی اوز توییتر صحیفه‌سیده افغانستان دولتی بیلن طالبان نینگ بیرینچی ییغینی تیزلیک‌که دوحه ده یولگه قوییلیشی‌نی ایتگن ایدی.
شونینگدیک، بوندن آلدین افغانستان تینچلیک لایحه‌سی بوییچه امریکانی خاص نماینده‌سی زلمی خلیلزاد، دنیا و منطقه مملکت‌لری تینچلیک تأمین‌لنیشی اوچون افغانستان نینگ سعی و حرکت‌لریدن حمایت قیلیشی‌نی بیلدیرگن ایدی.
