برقی کیملیکلرنی ترقهتیش باشی بیر کوچهده ایلهنیب قالگندن کیین، حکومت ینگی لایحهنی قولگه آلگن.
مملکت اهالینی رویخطگه آلیش ادارهسی نینگ مسووللری، بو ادارهگه جمهور رییسلیک سرایی تامانیدن کیلگن طرحده بوندن بویان کتابچهیی کیملیکلر فارسی، پشتو و انگلیسی تیللرده ترقهتیلیشی قید ایتیلگن.
سیاسی تحلیلچیلر کتابچهیی کیملیک ترقهتیشنی آرتگه قدم قوییش دیدیلر. اولرنینگ تعبیریچه، کتابچهیی کیملیکلرنی ترقهتیب بیریش مملکتده اداری فساد آلدی آلینیشی اوچون کومک قیلمیدی. بو کیملیکلر آرقهلی کوپراق ساختهلشتیریش حاللری یوز بیریشی ممکن.
سلاموطندارگه صحبت بیرگن سیاسی تحلیلچی غفوراحمد جاوید، بغضی بیر سیاسی سیمالر همده قوم یاش اولوغلری برقی کیملیکلر ترقهتیلمس لیگی اوچون سرمایه یاتقیزگنلر دیگن. او، بو شخصیتلر هیچ بیر زمان برقی کیملیکلر ترقهتیلشی اوچون رخصت بیرمیدیلر دیدی.
اداری فساد آلدی آلینیشی و هر قندهی ساخته لشتیریلگن سیز سیلاولر اوتکزیلیشی اوچون برقی کیملیکلرنی ییریک فایدهسی بارلیگی اوستیده علیحده تاکید قیلگن جناب جاوید.
نمایندهلر مجلسی ایچکی امنیت کمیسیونی نینگ اعضاسی صالحمحمد صالح، کتابچهیی کیملیکلر ترقهتیلیشینی تنقید آستیگه آلیب، کتابچهیی کیملیکلر ترقهتیلیشی بیلن فسادنی آلدینی آلیش ناممکن دیگن لیگینی بیلدیرگن. کوچلی احتمال بیلن کتابچهیی کیملیکلر ساختهلشتیریلگن حالده، چیت دولتلرده باسیلهدی دیگن او.
ایچکی ایشلر وزیرلیگی نینگ سوزلاووچیسی صدیق صدیقی، ورقی کیملیکلر اوزگرتیریلیشی اوچون بولر کتابچهیی کیملیکلر ترقهتیشلرینی تیلگه آلگن. ورقی کیملیکلردن کوره کتابچهیی کیملیکلرده تقلب آز بولیشی ممکن دیگن صدیقی.
