د افغانستان د ټاکنو د څار بنسټ مسوولان وايي، چې په ټاکنیزو بنسټونو کې د نه سمون له کبله د ولسي جرګې او د ولسوالیو شوراګانو په راتلونکیو ټاکنو مدني بنسټونه او هېوادوال بې باوره شوي دي.
ایوا یا د افغانستان د ټاکنو د څار بنسټ غړی شاه محمد مل نن چهارشنبې د (می پر ۴مه) په کابل کې یوې خبري غونډه ته وویل، چې په ټاکنو کې د سمون راوستلو په اړه د ولسمشر د فرمان ناڅرګند برخلیک او د ټاکنو ځنډولو خلک په دې کمېسیون بې باوره کړي دي.
ده وویل، چې د ولسمشر تقنیني فرمان ولسي جرګې ته لېږل شوی دی او ټاکل شوې ده، تر راتلونکیو دوو اونیو پورې په اجنډا کې ونیول شي.
مل د ولسي جرګې له غړیو وغوښتل، چې ژر تر ژره دې د ولسمشر د دې فرمان په اړه پرېکړه وکړي، چې د راتلونکیو ټاکنو په اړه د خلکو اندېښنې را کمې شي.
شاه محمد مل د غواروي کمېټې له غړیو وغوښتل، چې د نویو کمېشنرانو د غوراوي په برخه کې دې ناپېيلتوب وساتي.
د افغانستان د ټاکنو د څار بنسټ حکومت ته خبرداری ورکوي، وايي، چې که د ټاکنو په برخه کې شته ستونزې حل نه کړي، زیات شمېر هېوادوال به په راتلونکیو ټاکنو کې ګډون ونه کړي.
د ټاکنو په خپلواک کمېسیون کې د سمون راوستل د ولسمشر غني او اجرایوي رییس تر منځ د لاسلیک شوې سیاسي هوکړې مهمه ماده وه.
دا په داسې حال کې ده، چې د ملي یووالي حکومت د کار یونیم کال پوره شو، خو د ټاکنو په خپلواک کمېسیون کې اصلاحات را منځته شوي نه دي.
