د جنرال عبدالرشید دوستم او نظامالدین قیصاري پلویان د شپږمې ورځې لهپاره په پرلهپسې ډول د حکومتضد شعارونو له ورکولو سره راوتلي او وايي، که حکومت یې خبره وانهاوري؛ د نافرمانۍ تر حده به خپلو اعتراضونو ته دوام ورکړي او د «جنوبي ترکستان» په نامه به خودمختاره حکومت اعلان کړي.
د ملي جنبش ګوند د جوزجان د څانګې د ځوانانو رییس قدرتالله وطن، مولوي محمدشریف فاروقي او عبدالحمید صمیم د قومي شورا رییس وايي، که حکومت یې غوښتنو ته ځواب ونه وايي، که هر څه پېښ شول؛ مسوول به یې حکومت وي.
دوی له نړۍوالې ټولنې غوښتنه وکړه چې د هېواد شمالي ولایتونو ته د وضعیت د څېړنې په پار یو پلاوی ور ولېږي.
تراوسه پورې فاریاب، بغلان او تخار ولایتونو کې د جنرال دوستم سلګونو پلویانو اعتراض کړی او له حکومته یې غوښتي؛ ترڅو د هغوی په باور له نفاق اچولو او قومپالنې ډډه وکړي.
د ولسمشر د ویاند مرستیال شاه حسین مرتضوي له پوځي لارې د ګټې اخیستو او د خودمختاره حکومت اعلانولو ټاکنې په اړه د اعتراض کوونکیو خبرداري په ځواب کې وايي، حکومت به هرې پوښتنې ته په خپل وخت ځواب ورکړي.
سره له دې چې د دوستم او قیصاري د پلویانو اعتراضونه شپږمې ورځې ته وغځېدل، خو تراوسه پورې د اعتراض کوونکیو د قهر ارمه کولو لهپاره هېڅ کار شوی نهدی او مشخصه نه ده چې دغه اعتراضونه به تر کومه بریده پراخ شي.
