اوتگن کون «جمعه» فیض‌آباد بلدیه باشلیغی جنرال نذیرمحمد نیازی‌نینگ آدم‌لریگه قرشی امنیتی کوچلر تامانیدن آتیلگن اوق نتیجه‌سیده، اونینگ آدم‌لریدن 2 ته‌سی یره‌لنگن و بو موضوع امنیتی کوچلر و فیض‌آباد بلدیه باشلیغی آره‌سیده یریم ساعت‌لیک آتیشمه‌گه سبب بولگن، شو یوزه‌دن اهالی محلی حکومت گه قرشی اعتراض بیلدیرگن.
اعتراضچی‌لرنینگ ایتیشیچه، بدخشان حاکمی‌نینگ مدیریت‌سیزلیگی و ظرفیت‌سیزلیگی اهالی و حکومت آره‌سیده فاصله ایجاد ایتیلیشی‌گه سبب بولگن و اعتراضچی‌لر ایسه 7 ماده‌لیک بیر قطع‌نامه آرقه‌لی مرکزی حکومت‌دن مذکور ولایت حاکمی‌نینگ وظیفه‌سیدن چیکلنتیریشی‌نی سوره‌گن‌لر.
اعتراضچی‌لرگه کوره، ناتینچلیک میزانی آشگنی، بدخشان مرکزی فیض‌آباد شهری‌نینگ 25 کیلومترلیگی گچه قوراللی طالب‌لرنینگ فعالیتی کینگه‌یگنی، اداری فساد، خویش‌خورلیک و بدخشان حاکمی تامانیدن اجتماعی قره‌مه قرشی‌لیک‌لرگه قول اورولیشی و حکومت توغری شکلده مدیریت بولمه‌گنی باعث، حکومت و اهالی آره‌سیده فاصله ایجاد ایتیلگن.
عین حالده، بدخشان حاکمی سوزلاوچیسی نیک‌محمد نظری‌نینگ ایتیشیچه، اعتراض بیلدیریش یشاوچیلرنینگ حقی دیر و بدخشان ولایتی‌نینگ رسمی‌لرینی مدیریت‌سیزلیگی و ظرفیت‌سیزلیک‌لری توغریسیده حجت‌لری بولگن صورتده، مرکزی حکومت گه تاپشیرسین‌لر و مرکزی حکومت ایسه تاپشیریلگن حجت اساسیده، بدخشان حاکمی توغریسیده قرار قیله‌دی.
بیراق، اعتراضچی‌لرنینگ ایتیشیچه، بدخشان حاکمی‌نینگ ظرفیت‌سیزلیگی قویاش کبی آچیق دیر و او، وظیفه‌سیدن چیکلنتیریلگونگه‌قدر اعتراضلریدن قول تارتمه‌یدیلر.
