افغانستان جمهور رییسی محمداشرف غنی بوگون (دوشنبه) ملی کینگش نینگ فوق العاده قوشمه ییغینی‌ده قتنه شیب، حکومت نینگ مملکت‌ده دوام ایته‌دیگن اوروشلر همده تینچلیک مذاکره‌لری باره سیده‌گی موقفی‌نی بیان ایتدی. جناب غنی اوز سوزلریده قوشنی پاکستاننی ترورچیلیککه قرشی کوره‌شده اوز وعده‌لریگه کوره تینیق عمل قیلمه یاتگنی‌گه اشاره قیلیب رسمی اسلام‌آباد دن یخشی و یامان طالب‌لر دییش‌دن واز کیچیب ترورچیلیککه قرشی کوره‌شده دنیا جماعه چیلیگی‌نینگ ساغلام بیر اعضاسی صفتی‌ده عمل قیلیشی‌نی سوره‌دی. مملکت رهبری افغانستان خلقی نینگ اوزلوکسیز ایستک‌لری اساسیده بیرلشگن ملت‌لر تشکیلاتی‌نینگ امنیت کینگشی‌گه شکایت قیلیشی‌نی هم تیلگه آلدی.
رسمی پاکستان تورت تامانلمه مذاکره‌لرده تینچلیک مذاکره‌لریگه حاضر بولمه گن گروه‌لرگه قرشی حربی عملیاتلری اوتکزیشی باره سیده هم تاکیدلب کیلگن ایدی. اما عمل‌ده پاکستان دولتی نه فقط طالباننی مذاکره‌لرگه ترغیب ایتمه‌دی، بلکه هر دایم گی‌دیک اولرنی حمایت ایشده دوام ایتتیردی. محمداشرف غنی اوز سوزلریده رسمی اسلام‌آبادنی پاکستاننی طالبان‌گه قرشی عمل قیلمه گنی باره‌سیده شکایت قیلیب، او رسمی اسلام‌آبادنی پاکستان‌ده‌گی افغان طالب‌لرنی اوشلب آلیب افغانستان تامانی‌گه تاپشیریشی‌نی معلوم قیلدی.
رسمی اسلام‌آباد بیر نیچه آیدن بیری افغانستان‌ده حقیقی برقرارلیک‌نی تامینلش مقصدی‌ده تورت تامانلمه ییغین‌لرده طالب‌لرنی تینچلیک مذاکره‌لریگه حاضر ایتیشی توغریسی‌ده وعده بیرگن ایدی. پاکستان رسمی‌لری تورلی بهانه‌لر یوزه سیدن طالب‌لرنی مذاکره‌لرگه اوتکزیش‌گه ترغیب ایتمه‌گنی، مملکت‌ده جنگری‌لرنینگ یازگی حمله‌لری اوج آلیشی شونینگ‌دیک اوتگن سه‌شنبه کونی پایتخت کابل‌ده صادر ایتیلگن قانلی هجوملرحکومت‌نی مملکت‌ده جنگ و صلح مساله‌سی‌گه آچیق راق موقف آلیش‌لیککه مجبور ایتگن.
محمداشرف غنی اوزی نینگ مملکت ملی مجلسی‌ده قیلگن چیقیشی‌ده القاعده، داعش، حقانی ترور ترماغی همده تینچ‌لیککه بویین ایگمه‌یدیگن طالب‌لرنی افغانستان خلقی‌نینگ دشمن‌لری دیب خطاب قیلدی. او، محکمه تامانیدن اولیم جزاسی‌گه حکم ایتیلگن طالبان و افغانستان دشمن‌لری اوستیدن محکمه بویروغی‌نی توختلمس‌دن عمل‌گه آشیریشی‌نی هم اوقتیردی. افغانستان دولتی رهبری، هلی گچه هیچ قچان طالب‌لر همده اولرنینگ چیت ایللیک حامی‌لریگه قرشی بونده‌ی آچیق گپ‌لرنی گپیرمه گن.
.jpg)
دولت بلند مرتبه‌لی رسمی‌لری بوندن آلدین هر دایم افغانستان خلقی و ملی مجلس اعضالری تامانیدن طالبان‌گه قرشی جدی عمل قیلمه یاتگن‌لیککه عیب‌لنیب، بعضی بیر حاللرده حکومت نینگ ایریم تیوره‌ک‌لری ترورچی‌لردن حمایت ایتیب کیله یاتگن‌لیککه عیب‌لنیب کیلردی.
افغانستان رهبری نینگ سونگی چیقیشی مملکت اهالیسی‌گه دولت‌نی ترورچیلیککه قرشی کوره‌شده مستحکم اراده‌گه ایگه بولگنی‌نی اثباتلسه-ده، طالباننی حمایت ایته دیگن ایریم دولت‌لر اینیقسه پاکستاننی مساله گه جدی یانده‌شیش‌گه مجبور ایتیشی کوتیله‌دی. افغانستان دولتی اوزی نینگ ینگی موقعی‌نی مستحکم‌لش اوچون خلق ارا جماعه چیلیک اینیقسه ناتوگه اعضا دولت‌لر جمله‌دن امیریکه قوشمه ایالت‌لری حمایتی‌نی جلب ایتیشی هم لازم. عکس حالده بو قبیل چیقیشلر بیر نیچه کون اهالی‌نی خرسند قیلیش‌دن بولک نتیجه آلیب کیلمه‌یدی.
افغانستان دولتی بوکونگه قدر مملکت‌ده تینچ‌لیک‌نی برقرار ایتیش باره‌سیده کوپ فرصت‌لرنی قول‌دن بیرگن. پاکستان تامانی افغانستان‌ده کوزله‌گن مقصدلری‌گه ایریشمس‌دن بو یورت‌ده تینچلیک تامین‌لنیشی اوچون عمل قیلمه‌یدی. رسمی کابل بوندن انچه آی آلدین اوزی نینگ بوکونگی موقفی‌نی اعلان ایتیشی کیره‌ک ایدی. حکومت بلند مرتبه‌لی رسمی‌لری اسلام‌آبادگه باسیم اوتکزیش اوچون بار امکان‌لر و چاره لردن فایده‌لنیش‌لری درکار. افغانستان‌ده برقرارلیک اورنه‌تیلیشی نینگ اصلی کلیدی پاکستان‌نینگ قولی‌ده بولگنی هیچ کیم‌گه سر بولمسه کیره‌ک.
افغانستان خلقی جمهور رییس محمداشرف غنی نینگ سونگی چیقیشی‌نی خوش قرشی‌له‌شی و اوندن حمایت ایتیشی‌گه هیچ قنده‌ی شک – شبهه موجود ایمس. مملکت ایچکریسی‌ده افغانستان قورال‌لی کوچلرینی زمانوی قورال اسلحه‌لر بیلن قورال‌لنتیریب اولرنی دشمن‌گه قرشی سفر بر ایتیش، عین حالده طالبان‌گه قرشی عصیان کوترگن محلی اهالی‌نی هر تامانلمه حمایت ایتیش آرقه‌لی جنگری‌لرنی جدی شکست‌لرگه روپه‌ره قیلیش ممکن.
بوکونگه قدر حکومت‌نی ترورچی‌لر و طالبان‌گه قرشی سست‌لیک بیلن عمل قیلگنی و پاکستان نینگ اساس سیز وعده‌لریگه ایشانیب فرصت‌لرنی بای بیریب کیلگنی ملی امنیت کوچ‌لری روحیه‌سی و مورالی‌گه سلبی تاثیر اوتکزگن.
حکومت طالباننی جنگ جبهه‌لری‌ده شکست بیریش آرقه‌لی اولرنی تینچلیک مذاکره‌لریگه مجبور ایتیشی کیره‌ک. عکس حالده وضعیت بوکونگی‌دن یامانله‌شیب افغانستان خلقی اوزاق ییل‌لر دوام ایتیب کیلگن اوروشلر گردابی‌دن نجات تاپیش‌لری ممکن ایمس. عین حالده افغانستان حکومتی‌نی اوزی نینگ طالبان‌گه قرشی جدیتی‌نی حکومت نینگ ایریم مهم اداره‌لری اینیقسه حربی کوچ‌لر و امنیتی اداره‌لری‌ده لازم اصلاحات‌لر کیریتمس‌دن عمل‌گه آشیریشی محال کورینه‌دی.
