افغانستان اساسی قانوننینگ 61- مادهسی اساسیده، ملی بیرلیک حکومتنینگ دورانی یکونلنگن.
بوگون «دوشنبه» گذار حرکتی شو مناسبت گه اساس ییغین اوتکزگن و بو حرکت باشلیغی هارون معترف نینگ ایتیشیچه، اولر قانوندانلر و سیاستچیلر بیلن بیرگه اساسی قانوننینگ 61- مادهسی توغریسیده نیچه آی بحث اوتکزیب قولگه کیریتگن نتیجه اساسیده، حکومت نینگ ایش دوری اساسی قانون گه کوره تورت ییل بولگن و حکومت دوامی جاری ییل، 1- جوزا دن سونگ، قانونی ایمس دیر.
شونینگدیک، سیلاولر کمیسیونینینگ سابق باشلیغی فضلاحمد معنوینینگ ایتیشیچه، اساسی قانون جوده هم قولی تیل بیلن یازیلگن، بیراق جمهورلیک ریاستی، قصدی شکلده اونی تحریف قیلهدی. او، سیاستچیلر و حکومت باشلیغلریدن ملی بیرلیک حکومت دورانی یکونلنگن مسئلهنی جدی آلیشلرینی سورهیدی.
بیراق، جمهورلیک ریاستی سوزلاوچیسینینگ اورین باسری داوخان مینهپال، بو بیاناتلرنی رد قیلیب ایتیشیچه، جمهورلیک ریاستینینگ ایش دوری 1398- ییل، 1- جوزا ده یکونلنهدی. جناب مینهپال گه کوره، باشقه محکمه و شونینگدیک، اساسی قانوننی تفسیر قیلووچی کمیته، مذکور تأریخ نی جمهورلیک ریاستینینگ ایش دوری یکونلنیش تاریخی اعلان قیلگن.
عین حالده، گذار حرکتی اوشبو ییغین اداغیده، 6 مادهلیک بیر ریجهنی ملی بیرلیک حکومتی گه تکلیف قیلگن و بو ریجهده وقتینچهلیک حکومت تشکیل ایتیلیشی، بیرلشگن ملتلر تشکیلاتی، ناتو و امریکانینگ نظارتیده سیلاو یولگه قوییلیشی، حربی کمیته تشکیل ایتیلیشی و سیلاولر یولگه قوییلیشی اوچون زمینه یرهتیلیش موضوعلری کیریتیلگن.
