افغانستان جمهورلیک ریاست سوزلاوچیسی صدیق صدیقی نینگ ایتیشیچه، کابینه نینگ ینگی قراری اساسیده، هر ولایتده بیر عیال والی نینگ اورین باسری صفتیده تعیین ایتیله‌دی.
بوگون «دوشنبه، 16- سرطان» خبری بیر ییغینده صدیق صدیقی نینگ ایتیشیچه، والی نینگ اورین باسری توغریسیده بولگن ریجه عیاللرنینگ وزیرلیگی تامانیدن کابینه گه تکلیف قیلینگن و کابینه محلی ارگانلر ایرکین اداره‌سی گه والی نینگ عیال اورین باسری اوچون پست ایجاد قیلیش گه بویروغ بیرگن.
صدیقی نینگ علاوه قیلیشیچه، کابینه هرات، قندهار، مزارشریف، خوست و ننگرهار شهرلری نینگ رواجلنتیریش ریجه‌سی توغریسیده ییترلیچه تیارگرلیک آلینیشی خصوصیده قرار قیلگن و بو ریجه اوچون کیره‌ک بوله‌دیگن امکانیت تیار بولگنیدن ایشانچ بیرگن.
ایتیش کیره‌ک کیم، بوندن آلدین جمهور رئیس غنی لوگر ولایتی گه قیلگن سفریده مذکور ولایت نینگ بویوک‌لریدن بیرقطاری نینگ ایسته‌گی گه 10 کون ایچیده اوشبو ولایتده بیر عیال والی نینگ اورین باسری صفتیده تعیین ایتیلیشی توغریسیده بویروغ بیرگن ایدی.
باشقه تاماندن کابینه نینگ قراری اساسیده، کیله‌سی اوچ هفته جریانیده کابینه نینگ بوتون اعضالری، والی‌لر، ملی کینگش اعضالری و دولت نینگ بلند مرتبه‌لی رسمی‌لری دارایی‌لرینی رویخط گه بیریش‌لری کیره‌ک.
شونینگدیک، اوشبو ییغینده جمهورلیک ریاست سوزلاوچیسی نینگ ایتیشیچه، افغانستان دولتی افغانلر ارا سوزلشوولر باشله‌نیشی و یخشی نیت کورسه‌تیش اوچون طالبان نینگ محبوس‌لریدن 4 مینگ و 15 ته‌سینی قوییب یوبارگن، بیراق طالبان گروهی حاضرگه‌قدر دولت محبوس‌لریدن یالغیز 700 ته‌سینی قوییب یوبارگن و اولرنینگ بو حرکتی ییترلی ایمس دیر.
جمهورلیک ریاست سوزلاوچیسی نینگ اورغولشیچه، زوروانلیک‌لر کمه‌ییشی و افغانلر ارا سوزلشوولر باشله‌نیشی افغانستان دولتی و اهالیسی نینگ ایسته‌گی دیر و طالبان بو توغریده جدی شکلده حرکت قیلیشی کیره‌ک. اونینگ کوپه‌یتیریشیچه، افغانستان حاضرگه‌قدر زوروانلیک‌لرگه گواه دیر و بو وضعیت اهالی، دولت و دنیا جماعه‌چیلیگی تامانیدن قبول قیلینمه‌یدی.
