ارګ: لوړ پوړی پلاوی به د لاسوهنې په اړه پاکستانیو چارواکو ته کره سندونه وړاندې کړي

د ولسمشر د ویاندویانو دفترځای ناستي شاحسین مرتضوي سلام‌وطندار ته وویل، د کورنیو چارو وزیر ویس احمد برمک او د ملي امنیت لوی رییس معصوم ستانکزی اسلام اباد ته تللي چې د هغه هېواد چارواکیو ته یولړ مهم او کره سندونه وسپاري.

په داسې حال کې چې ځینو پاکستانیو رسنیو ویلي پرون ولسمشر محمد اشرف غني د پاکستان د لومړي وزیر شاهد خاقان عباسي تیلیفون ته ځواب نه دی ورکړی خو د پاکستان د لومړي وزیر یو پیغام ور رسېدلی دی.   

په پاکستان کې د افغانستان سفیر حضرت عمر زاخېلوال ویلي د پاکستان لومړي وزیر تیلیفوني رابطه نه ده کړې خو پیغام یې ولسمشر غني ترلاسه کړی او نن (چهارشنبه) ولسمشر یو پلاوی پاکستان ته استولی دی.

اخوا د پاکستان د بهرنیو چارو وزارت ویاند محمد فیصل رسنیو ته ویلي چې پاکستان د ۲۷ شکمنو ترهگرو یوه ډله د تېرکال په نومبر میاشت کې افغانستان ته سپارلې وه خو دا یې نه دي ویلي دغه کسان څه وخت او چېرته نیول شوي وو.

خو افغان حکومت بیا د پاکستانیو چارواکیو دا ادعا رد کړې چې ګنې د طالبانو او حقاني ډلې اړوند ۲۷ کسان یې کابل ته سپارلي دي.