د امریکا ولسمشر ډونالډ ټرمپ تازه ویلي چې له افغانستانه خپل ټول ځواکونه وباسي.
نوموړي پرون له خبریالانو سره په مرکه کې که څه هم د خپلو ځواکونو د اېستلو کره نېټه نه ده په ډاګه کړې، خو ویلي ې دي چې «په ډېرې مناسبې تېزۍ» سره به یې ځواکونه افغانستان پرېږدي.
هغه ټینګار کړی چې امریکايي ځواکونو په افغانستان کې یوازې د پولیسو رول لوبولی دی.
ډونالډ ټرمپ زیاته کړې، که په افغانستان کې د امریکايي ځواکونو بېرته ورتګ ته اړتیا وي، دوی به خپل ځواکونه د پولیسو په څېر نه، بلکې د مبارزو جنګیالیو په توګه ور واستوي.
د امریکا ولسمشر ویلي: «موږ له ۱۹ کلونو راهیسې په افغانستان کې یو او زما اند همدا بس ده. که موږ وغواړو، هر مهال بېءته ورتللی شوو.»
خو نیویارک ټایمز ورځپانې د یوې باخبرې سرچینې له قوله لیکلي، ډونالډ ټرمپ چې د ولسمشرۍ ټاکنو ته د جمهوري غوښتونکو ګوند نوماند دی، هڅه کوي چې له افغانستانه د خپلو ځواکونو د را اېستلو هغه ژمنه پوره کړي چې د ۲۰۱۶ کال په ټاکنو کې یې کړې وه.
د امریکا او طالبانو د سولې هوکړهلیک له مخې چې د تېر کال په کب میاشت کې د قطر په پلازمېنې دوحه کې لاسلیک شو، ټاکل شوې دغه هېواد په څلورو میاشتو کې د خپلو سرتېرو شمېر ۸۶۰۰ ته راټیټ کړي او تر ۱۴ میاشتو پورې ټول امریکايي ځواکونه افغانستان پرېږدي.
