د ۱۳۹۶ل،م کال پای ته رسېدو سره د ارګ او عطامحمد نور لانجه هم پای ته ورسېده.
یوې معتبرې حکومتي سرچینې د نوم نه خپرولو په شرط سلاموطندار ته وویل، د حکومتي جوړښت بدلون او سمون پرته ارګ له نور سره د طبیعي پېښو پروړاندې د مبارزې وزارت، د پوهنې وزارت، د بلخ ولایت پر څوکۍ او د امنیې قوماندانۍ پر څوکۍ هوکړې ته رسېدلي؛ ښايي د نوي کال په لومړۍ ورځ دغه هوکړه رسما اعلان شي.
د سرچینې په خبره، نجیب فهیم د طبیعي پېښو سره د مبارزې وزیر او میرویس بلخي د پوهنې وزیر په توګه د جمعیت لهخوا وړاندیز شوي دي.
د عطامحمد نور ویاند منیراحمد فرهاد وايي، د ارګ او عطامحمد نور ترمنځ د لانجې حل هوکړه شوې او ډېرژر به یې جزیات رسنیز شي او زیاتوي، «بیا هم د دې هوکړې وروستۍ پرېکړه د جمعیت په لاس کې ده.»
له ارګ سره د جمعیت ګوند مرکچي پلاوي یوغړی وايي، هغوی له ارګ سره د ښاغلي نور خبرو کې هېڅ رول نهلري او دغه پلاوی د ولسمشرۍ ماڼۍ او عطامحمد نور ترمنځ د هوکړې جزییاتو په اړه معلومات نه لري.
دغه سرچینه زیاتوي، دوی یوازې خبر شوي چې دې برخه کې د ارګ او ښاغلي نور ترمنځ هوکړه شوې ده.
له دې وړاندې هم ارګ سره د جمعیت ګوند د مرکهچي پلاوي یو غړي ویلي و، ولسمشرۍ ماڼۍ د نور راضي کولو هڅه کوي.
ولسمشرۍ ماڼۍ په دې اړه څه نه وايي، خو د سیمهییزو ارګانونو خپلواکې ادارې ویانده منیره یوسفزاده وايي، هغوی د ارګ او جمعیت ګوند ترمنځ هوکړې په اړه اطلاع نهلري.
