افغانستان‌ده اورپا اتفاقی‌نینگ مخصوص نماینده‌سی جناب فرانزمایکل میلبن، «افغانستان‌ده اداری فسادگه قرشی» کورشیش نامی آستی‌ده یولگن قوییلگن ییغین‌ده چیقیش قیلیب، اداری فساد افغانستان‌لیک‌لر حیاتی‌نینگ برچه بولیم‌لریگه ایلدیز آتگن لیگی‌نی ایتگن.
میلبن‌نینگ مالی و اداری فساد توغریسی‌ده اشاره قیلیب ایتیشیچه، افغانستان‌ده دوام ایته‌دیگن فساد خوف‌سیزلیک و رواجله‌نیشنی معمالرگه روپه ره قیله‌دی. شونینگ‌دیک دولت قانونی‌لیگی‌نی هم سوال استیگه آله دی دیگن میلبن. اونگه کوره، اداری فساد مملکت بودجه‌سینی چیکلنتیریب ایچکی و تشقی سرمایه یاتقزووچیلرگه هم سلبی تاثیر اوتکزه‌دی.
ییغین‌ده افغانستان جمهور رییسی نینگ مخصوص نماینده‌سی احمدضیا مسعود شامل دولت نینگ بلند مرتبه‌لی رسمیلری جمله‌دن عدلیه وزیری عبدالبصیر انور، مهاجرلر وزیری عالمی بلخی و قیشلاقلرنی رواجلنتیریش وزیری نصیراحمد درانی‌لر اشتراک قیلگن‌لر. اروپا اتفاتی وکالت‌خانه‌سیده اوتکزیلگن ییغین‌ده افغانستان‌ده عمل‌ده اداری فسادگه قرشی کوره‌شیش مساله‌سی محاکمه ایتیلگن.
میلبن جمهور رییس غنی‌نینگ امریکه‌ده او مملکت تشقی ایشلر وزیری جان کری بیلن بولگن صحبتی‌گه اشاره قیلیب ایتیشیچه، جمهور رییس غنی « افغانستان اداری فسادگه باتگن‌لیگی‌نی تصدیق‌لیمن» دیگن ایدی. شونینگ‌دیک جناب غنی مملکت‌ده‌گی اداری فسادنی « ملی اویت، همده چیده‌ب بولمیدیگن مساله» دیگن ایدی.
ملی بیرلیک حکومتی‌نینگ اداری فسادگه قرشی کوره‌شیش آلیب باریشی اوچون خوشبین‌لیک بیلدیرگن اروپا نماینده‌سی گه کوره، عمومن آلگن‌ده ینگی حکومت اداری فساد اوچون جدی بولگن.
ییغین دوامیده سوزگه چیققن افغانستان جمهور رییسی نینگ یخشی حکومتچیلیک اوچون مخصوص نماینده‌سی احمدضیا مسعود میلبن نینگ سوزلرینی تصدیق‌لب ایتیشیچه، قانون تطبیق ایتیلمس‌لیگی، سیاسی شخصیت‌لر باسیمی، اداره‌لرده حکم سوره‌دیگن بوروکراسی و دولت اداره‌لری نینگ سیاسی بولیشی مملکت‌ده اداری فساد کینگ کولم‌ده ایلدیز آتیشی‌گه باعث بولگن.
جناب مسعود مدنی جماعه‌چیلیک همده اهالی‌دن اداری فسادگه قرشی کوره‌شیش اوچون دولت‌گه همکارلیک قیلیشنی سوره‌گن. افغانستان اهالی‌سی دولت همده نا دولت اداره لریده‌گی موجود اداری فساد باره‌سیده حکومت‌نی جریانگه قویمه‌گن حالده، ملی بیرلیک حکومتی اداری و مالی مفسدلر خصوصیده جدی قرار آله‌دی.
یخشی حکومتچیلیک اوچون جمهور رییس نینگ مخصوص نماینده‌سی، اداری فسادگه قرشی کوره‌شیش اوچون ملکی خذمت‌لر قانونی تصدیق‌له‌نیشی ضرور دیگن.
مملکت مالیه وزیری داکتر عبدالبصیرنینگ اداری فساد آشگن‌لیگی توغریسی‌ده اشاره قیلیب ایتیشیچه، دولت اداره‌لری ملازم‌لری نینگ آیلیک‌لری کملیگی، مملکت بودجه‌سی حیف ومیل ایتیلیشی و زوروان شخص‌لرنی حکومت‌گه نفوذ قیلیشی مملکت‌ده‌گی اداری فسادنینگ ییریک دلیل‌لردن.
مذکور ییغین بوندن نیچه هفته آلدین افغانستان جمهور رییسی محمد اشرف‌غنی ایچکی و تشقی کیلشوولر تیکشیریلیشی اوچون «ملی تدارکات کمیسیونی» نی ایجاد قیلگن بیر پیت‌ده اوتکزیلماقده.
جمهور رییس‌غنی همده اجراییه باشلیغی عبدالله‌عبدالله‌لر سیلاولر آلدی ترغیبات برنامه‌لریده مملکت‌ده اداری فسادگه قرشی کوره‌شیش اوچون جدی تاکیدله‌گن ایدی‌لر.
