اردوغان: پوځ او دولتي ادارې به له “ویروسه” پاکې کړي

د ترکیې ولسمشر رجب طیب اردوغان له ناکامې کودتا وروسته په خپلې لومړنۍ بیانیه کې په دې هېواد کې درې میاشتې بېړنی حالت اعلان کړی او ویلي دي، چې د منتخب ولسمشر او د امنیتي ځواکونو د سراعلی قومندان په توګه به د امنیتي ځواکونو لیکې او دولتي بنستونو له "ویروسه" پاک کړي.

اردوغان وايي، دولت یې د پولیسو د قوماندانانو صلاحیت زیاتوي او ترکیه به خپلو موخو ته د رسېدو له پاره ولسواکي تر پوښو لاندې نه کړي.

د ترکیې ولسمشر ډاډ ورکوي، چې ولس دې اندېښنه نه کوي، د تېر په شا به ترکیه سوله او ټیکاوو ولري او ترکیه به دنړۍ د ځواکمن دولت په توګه په سیمه کې موجوده وي.

اونۍ مخکې د ترکیې د اردو یوې ډلې کودتا وکړه، خو له څو ساعتونو وروسته دغه کودتا ناکامه شوه.

د کودتاچیانو او پولیسو تر منځ په نښته کې له ۲۹۰ تنو زیات ووژل شول او ۱۴۰۰ تنه نور ټپیان شول.

له کودتا وروسته له ۶ زرو زیات کسان د افسرانو او قاضیانو په ګډون په کودتا کې د لاس لرلو په تور ونیول شول.

همدا ډول ۶۰۰ دینې مدرسې رخصت شوې او په زرګونه دولتي مامورین له دندو وباسل شول.

د ترکیې ولسمشر اردغان وايي، ښايي د دې هېواد پارلمان د اعدام په قانون غور وکړي او د سزا قانون ته یې بیا راوګرځوي.

په ترکیه کې ۲۵کاله کېږي، چې هېچا ته د اعدام حکوم نه دی اورول شوی او د اعدام سزا قانون ۱۲مخکې په ۲۰۰۴ کال کې له قوانینو حذف شوی دی.