د افغانستان نوین ملي بجهې مشر انوارالحق احدي، پر افغان حکومت د نیوکې ترڅنګ وايي، چې په حکومتي او دولتي پوسټونو کې ګومارنې غېر مسلکي او د پېسو په بدل کې کيږي.
د سوداګرۍ وزارت پخوانۍ وزیر او د افغانستان نوین د ملي جبهې رییس انوارالحق احدي، د پنجشنبې په ورځ کابل کې یوې غونډې ته وویل، د ملي یوالي په حکومت کې قانون او ښایسته سالاري په پام کې نه نیول کیږي او حکومتي چارواکي د پیسو په بدل کې او ارګ سره د سیاسي اړیکو له مخې ګومارل کیږي.
«د امنیتي چارواکو پلورل، ولایت په څو پلورل کیږي؟ د امنیت قوماندانۍ په څو پلورل کیږي؟ کوم وزارت چې پلورل کیږي یانې سیاسي ملاتړ ته ګوري.»
د احدي پر وینا، ملي یوالي حکومت په غیر مشروع او ایتلافي توګه جوړ شوی او همدې کبله زیات عام وګړو ملاتړ هم له ځانه سره نهلري.
د افغانستان د خلکو د ملي هوکړې بهیر بنسټ ایښودونکی او رییس فریدون الکوزي، چې په دې غونډه کې ګډون درلود ولسمشر غني ته په خطاب کې وویل، چې افغانستان د ټولو قومونو کور دی او نباید حکومت یو قوم ته ځانګړی شي.
الکوزي له نړیوالې ټولنې وغوښتل، چې پر حکومت د فشار له لارې د هغوی د ناکامې پالیسۍ د عملي کیدو مخه ونیسي.
د ولسمشر ویاند دواخان مینهپال د احدي د دغو څرګندولو په رد سره سلاموطندرا ته وویل، که چیرې د افغانستان نوین ملي جبهې رییس د خپلو ادعاو ثابتولو په اړه اسناد لري، نو کولای شي چې له ولسمشرۍ ماڼۍ سره دې شریک کړي.
هغه وویل:«موږ په بشپړه توګه دغه څرګندونې ردوو هغوی که کوم سند وړاندې ولای شي مهرباني دې وکړي افغانستان کې هيڅ څوکۍ د پیسو په بدل کې نه ده پلورل شوې موږ د فساد پروړاندې مبارزه کوو څوک چې په دې جرم ونیول شي عدلي او قضايي بنسټونو ته به وسپارل شي.»
د ملي یوالي حکومت کار کړنې مخکې لهدې هم له کلکو نیوکو سره مخ شوې دي، خو حکومتي چارواکي تل دغه ادعاوې رد کړي دي.
