.jpg)
وزیرلر کینگشی ییغینیده سوزگه چیقگن ملی بیرلیک حکومت اجراییه باشلیغی داکتر عبدالله، امیریکه حربی کوچلری تامانیدن ملامنصورنینگ موتری اوستیگه اویوشتیریلگن هوایی هجومنی تصدیقلب ایتیشیچه، احتمال باریچه ملامنصور اوشبو هجومده هلاک بولگن.
جناب عبداللهنینگ ایتیشیچه، ملامنصورنینگ اولیمی حتمی بولگن تقدیرده، قوراللی طالبلرنینگ سیاسی و حربی حرکتی و شونینگدیک، اوشبو گروه بیلن دولت مناسبتلری اوزگریب و برچه نرسه باشقه توسنی اوزیگه آلیشی ممکن.
شونینگدیک، امیریکه مدافعه وزیرلیگی بیر خبرنامه ترقهتیب ایتیشیچه، امیریکه حربی هوایی کوچلری افغانستان بیلن پاکستان چیگرهسیده قوراللی طالبلر رهبرینینگ موترینی هدف قرار بیرگن. پنتاگوننینگ ایتیشیچه، اوشبو هجومنی هر تامانلمه تیکشیرهدی و حاضرگچه قطعی نتیجهسینی ارایه قیلهآلمهیدی.
انه شوندهی، جمهورلیک ریاستی سرایی بیر خبرنامهده، طالبلرنینگ رهبری ملااختر منصورنینگ اوستیگه اویوشتیریلگن هجومنی تصدیقلهگن.
ملامنصورنینگ اولیمی توغریسیدهگی خبر پاکستان میدیالریده باش خط بولگن ایدی؛ بیراق پنتاگون قرشی، پاکستان میدیالری، طالبلرنینگ رهبرینی اولیمی توغریسیده ایشانچ بیلن سوزلهگن.
پاکستان ایرکین خبرچیلریدن بیری رزاق برق سلاموطندار بیلن اوتکزگن صحبتیده ایتیشیچه، ملا اختر منصورنینگ اولیمی قطعی دیر، بیراق پاکستان دولتی حاضرگچه بو توغریده هیچ نرسه دیمهیدی. جناب برقنینگ ایتیشیچه، ملامنصور بلوچستان ایالتی احمدوال منطقهسیده امیریکه هوا کوچلرینینگ هجومی نتیجهسیده هلاک بولگن.
قوراللی طالبلر، اوشبو گروه رهبرینینگ اولیمینی رد ایتگن.
احمدوال منطقهسی کویته جنوبینی 100 کیلو مترلیگیده جایلشگن، اوشبو منطقه افغانستاننی هلمند ولایتی و ایراننی سیستان و بلوچستان ولایتلری بیلن چیگرهداش بولگن. جناب برقگه کوره، احمدوال یقینیده «گردی جنگل» ناملی بیر کته میدان توزهلگن و انچه ییللردن بویان افغانستان فقرالریدن کمیده 40 مینگ کیشی او ییرده یشهیدی.
ایتیش لازم، نیچه ییل آلدین اوشبو منطقهده، قوراللی طالبلرنینگ تانیقلی رهبرلریدن بیری ملا دادالله هم اولدیریلگن ایدی. اوندن کیین، پاکستان دولتی اوشبو منطقهده 60 مینگ قوراللی کیشینی جایلشتیریب و منطقه امنیتینی نظارتگه آلدی.
