ملی بیرلیک حکومتی‌نینگ اجراییه باشلیغی عبدالله عبدالله بوگون دوشنبه ایرته‌لب بلند مرتبه‌لی هیأت باشچیلیگده ایکی کون‌لیک سفرده تاجکستان باردی.
اجراییه ریاستی تامانیدن ترقه تیلگن خبرنامه‌ده کیلیشیچه، عبدالله اوشبو سفرده تاجکستان نینگ باش وزیری و جمهور رییسی بیلن اوچره‌شیب سوزله‌شی ممکن.
خبرنامه‌ده، بو اوچره شووده اجراییه باشلیغی تاجکستان رسمی لری بیلن « سیاسی، اقتصادی، فرهنگی علاقه لرنی مستحکم‌لش و کینگیتریش، امنیتی تهدیدلر، ترروچی‌لیک و بنگی وارماده سیگه قرشی کوره شیش، اورته آسیا مملکت‌لری آرقه‌لی ایران و جنوبی آسیاگه برق ییتکزیش، منطقه مملکت‌لری اورته‌سیده تیمیر یول قوریش، افغانستان، پاکستان و تاجکستان نینگ ترانزیتی و اوچ تامانلمه کیلیشوو و منطقه همکارلیک‌لرینی کینگیتیریش، توغری‌سیده بحث اوتکزیشی کوتیله‌دی.
اجراییه ریاستی‌نینگ بیر خبرنامه‌ده ایتیشیچه، اوشبو سفر جریانیده اجراییه باشلیغی، افغانستان و تاجکستان ارا نیچه همکارلیک شرطنامه‌سی‌گه قول قوییشی ممکن.
شونینگ‌دیک جناب عبدالله بو سفر جریانیده، بیرلشگن ملت‌لر تشکیلاتی نینگ باش کاتبی و دنیا بویلب 100 دن آشه راق مملکت نماینده‌لری حضوریده تاجکستان پایتختی دوشنبه شهریده اوتکزیله‌دیگن «سوو حیات اوچون» ناملی خلق ارا اولتیریشی‌ده اشتراک ایتیب سوزله‌شی ممکن.
اجراییه باشلیغی‌نینگ اوشبو سفرده، تشقی ایشلر وزیری صلاح الدین ربانی، سوو و برق وزیری علی احمد عثمانی، اقتصاد وزیری عبدالستار مراد، اجراییه ریاستی ییریک مصلحتچیسی محمود صیقل، اجراییه ریاستی امنیتی مصلحتچیسی ظاهر اغبر، صناعت و تجارت، فواید عامه و کانلر وزیرلیک‌لری نینگ اورین باسرلری و اجراییه ریاستی نینگ سوزلاوچی‌سی مجیب الرحمان رحیمی یولداشلیک قیله‌دی.
جناب عبدالله دوشنبه شهری‌گه ییتیب بارگن چاغی‌ده، تاجکستان نینگ بلندمرتبه‌لی رسمی‌لری و باش وزیری تامانیدن خوش قرشلندی.
