اجرایوي رییس د بشر دوستانه مرستو کنفرانس کې د ګډون په پار ترکیې ته لاړ

د اجرایوي ریاست ویاند مجیب الرحمان رحیمي سلام وطندار ته وویل، چې ډاکټر عبدالله عبدالله د بشر دوستانه مرستو سرمشریزې غونډې کې د ګډون له پاره ترکيې ته تللی دی.

د ملګرو ملتونو له خوا په دغه جوړېدونکې غونډه کې د بېلابېلو هېوادونو لوړپوړي چارواکي ګډون کوي او په ټوله نړۍ کې د بشر دوستانه مرستو په اړه بحث کوي.

د اجرایوي ریاست د ویاند په وینا، عبدالله به په دغې غونډه کې نړیوالو ته د افغانستان د اړتیاوو په اړه معلومات ورکړي او د بشردوستانه مرستو په باب به روښانه تصویر وښيي.

په اوس وخت کې افغانستان زیاتو بشردوستانه مرستو ته اړتیا لري. له افغانستانه د ناټو ځواکونو له وتلو سره سم په افغانستان کې په سلګونو زره کسان د میلیوني بېکاره کسانو په ډله کې وراضافه شول او په زرګونو نور د اروپا په لوري مسافر شول.

د رحیمي په وینا، په دې غونډه کې د هېوادونو اړتیاوې او د بشر دوستانه مرستو په اړه به په لوړه کچه بحث وشي.

رحیمي زیاته کړه، چې د پناه غوښتلو او کډوالیو بحران، په کورنیو جګړو او طبیعي پېښو کې هېوادوالو ته اوښتي زیانونه د دولت په لومړیتوبونو کې دي او دا موضوع به په دې غونډه کې مطرح شي.

رحیمي همداراز وویل، چې اجرایوي رییس به د دې غونډې په څنډه کې د ملګرو ملتونو او بېلابېلو هېوادونو له لوړپوړیو مشرانو سره جلا لیده کاته وکړي.

له ډاکټر عبدالله سره په دې سفر کې د کډوالو وزیر او نور لوړپوړي چارواکي شامل دي.

د اجرایوي ریاست مسوولان وايي، چې په بشر دوستانه برخه کې به ملګري ملتونه او نور هېوادونه به د بشردوستانه مرستو په برخه کې خپلې ژمنې په لوړه کچه اعلان کړي.